தலிபான்களுக்கு நிதியுதவி செய்ததாக அமெரிக்காவில் இஸ்லாமிய மத தலைவர்கள் கைது!

பாகிஸ்தானில் தலிபான்களின் நடவடிக்கைகளுக்கு உதவியாத 6 பேரை

அமெரிக்க புலனாய்வு பிரிவினர் கைது செய்துள்ளனர். இவர்களில் புளோரிடா பள்ளிவாசலை சேர்ந்த இரு இஸ்லாமிய மத தலைவர்கள் உட்பட அமெரிக்க குடியுரிமை பெற்ற மூன்ரு நபர்களும், பாகிஸ்த்தானை சேர்ந்த மூவரும் அடங்குவர்.

கடந்த வெள்ளிக்கிழமை பாகிஸ்த்தானில் இடம்பெற்ற தற்கொலை குண்டு தாக்குதலில் 80 பேர் பலியாகியிருந்த நிலையில் அமெரிக்காவில் இக்கைது சம்பவம் நடந்துள்ளது. குறித்த நபர்கள், சுமார் 50,000 அமெரிக்க டாலர்களுக்கு மேலாக தலிபான்களுக்கு நிதியுதவி வழங்கியிருக்கிறார்கள் என அமெரிக்கா குற்றம் சாட்டியுள்ளது. மேலும் ஆட்களை கடத்துதல், ஆயுதங்களை பதுக்கிவைத்தல் போன்ற பல்வேறு குற்றச்சாட்டுக்கள் இவர்கள் மீது சுமத்தப்பட்டுள்ளது.

இவர்களது குற்றங்கள் நிரூபிக்கப்படும் பட்சத்தில் இந்த 6 பேருக்கும் 15 வருட சிறைத்தண்டனை வழங்கப்படலாம் என தெரிவிக்கப்படுகிறது.

இதேவேளை பாகிஸ்தானில் குறித்த தற்கொலை குண்டு தாக்குதலை மேற்கொண்டிருத தலிபான்கள், ஒசாமா பின்லாடன் கொல்லப்பட்டதற்கு முதல் பதிலடி இதுவென தெரிவித்திருந்தனர். தொடர்ச்சியான இம்முறுகல் நிலை சம்பவங்கள் பாகிஸ்த்தான், அமெரிக்கா இராஜதந்திர உறவில் பாதிப்பு ஏற்படுத்தக்கூடாது என அமெரிக்க செனெட்டர் ஜோன் கெரி தெரிவித்துள்ளார்.

முன்னதாக பாகிஸ்தான் வான் எல்லைக்குள் நுழைந்து வடமேற்கு பகுதிகளில் குண்டு வீசும் அமெரிக்காவின் ஆளில்லா விமானங்களை சுட்டு வீழ்த்துவோம் என நேற்று பாகிஸ்தான் விமான படை தளபதி எச்சரித்திருந்தார். மேலும், ஒசாமா மீதான தாக்குதலுக்கு பாகிஸ்த்தான் பாராளுமன்றத்திலும் கடும் கண்டனம் விடுக்கப்பட்டிருந்தது.