ஜோர்தானிலிருந்து நாடு திரும்பிய 50 இலங்கையர்

by **நேசமுடன் ஹாசிம்** Thu 19 May 2011 - 13:15

சம்பளம் உயர்வின்மை மற்றும் சில பிரச்சினைகள் காரணமாக ஜோர்தானிலிருந்து 50இற்கு மேற்பட்ட இலங்கை ஆடைத்தொழிற்சாலை ஊழியர்கள் நாடு திரும்பியுள்ளதாக வெளிநாட்டு வேலைவாய்ப்பு பணியகம் நேற்று அறிவித்தது.

சம்பள உயர்வு கோரி இவர்கள் மேற்கொண்ட வேலை நிறுத்தப் போராட்டம் வெளிநாட்டு வேலைவாய்ப்பு பணியகம் மற்றும் வெளிநாட்டு வேலைவாய்ப்பு அமைச்சின் இரு அதிகாரிகள் ஜோர்தான் சென்று கலந்துரையாடிய பின் கைவிடப்பட்டதாக வெளிநாட்டு வேலை வாய்ப்பு பணியகத் தலைவர் கிங்ஸ்லி ரணவக்க தெரிவித்தார்.எனினும் இவர்கள் சம்பள அதிகரிப்பு குறித்து திருப்தியடையாததாலும் ஜோர்தானிலுள்ள ஆடைத்தொழிற்சாலை ஊழியர்களுக்கிடையிலான கடுமையான நிலைவரம் காரணமாகவும் நாடு திரும்புவதாக அவர் குறிப்பிட்டார்.

வெளிநாட்டு வேலைவாய்ப்பு பணியகம் எந்தவிதமான நடவடிக்கையையும் உடனடியாக எடுக்காது என்ற அவர், ஜோர்தானிலுள்ள 10,000 ஆடைத்தொழிற்சாலை ஊழியர்களில் ஐந்து ஆடைத்தொழிற்சாலைகளில் பணிபுரியும் இலங்கையைச் சேர்ந்த 1,500 பேர் சம்பள உயர்வு கோரி வேலைநிறுத்தப் போராட்டத்தில் ஈடுபட்டதாக கூறினார்.