நல்லூர் கந்தசுவாமி கோயிலில் சிங்களக் கடைகள்

நல்லூர் கந்தசுவாமி கோயிலில் சிங்களக் கடைகள்

(செய்தி தொகுப்பு – இளந்தி -25/05/2011) வரலாற்று முக்கியத்துவம் வாய்ந்த தமிழ் மன்னர்களின் தலைநகரான யாழ் குடாவின் இதயப் பகுதியிலுள்ள நல்லூர் கந்தசுவாமி கோயிலைச் சுற்றி சிங்கள முதலாளிகளின் கடைக் கட்டிடங்கள் எழும்புகின்றன. இராணுவத்தின் மேற்பார்வையில் இது நடக்கிறது.

திலீபன் நினைவுத் தூபி இடிக்கப்பட்ட இடத்தைச் சுற்றியுள்ள வெளி நிலத்தில் ஏற்கனவே கடைக் கட்டிடங்கள் கட்டப்பட்டுள்ளன. அரச செலவில் சிங்கள இராணுவத்தின் மேற்பார்வையில் துரிதகதியில் இந்தப் பணி மேற்கொள்ளப்பட்டது.

யாழ் குடா பாராளுமன்ற கூட்டணி உறுப்பினர்களாலும் அமைச்சர் பதவி வகிக்கும் டக்ளஸ் தேவானந்தாவாலும் இந்த ஆக்கிரமிப்பை நிறுத்த முடியவில்லை. நல்லூர் கந்தசுவாமி கோயிலுக்கு அருகாமையில் இந்தியத் தூதரத்தின் அலுவலகம் இருப்பது குறிப்பிடத் தக்கது.

நல்லூர் கந்தசாமி கோயிலைச் சுற்றிய பகுதியில் உத்தியோகப் பற்றற்ற ஊரடங்கு உத்தரவை இராணுவம் போட்டுள்ளது. மாலை ஆறு மணி தொடக்கம் அதிகாலை வரை இந்தக் கேர்பியூ நீடிக்கிறது. மாலை நேரப் பூசையை நேரத்தோடு முடிக்கும்படி கோயில் நிர்வாகத்தை இராணுவம் பணித்துள்ளது.

இன்னும் ஒரு சில மாதங்;களில் வருடாந்திரத் திருவிழாக்கள் ஆரம்பிக்க இருப்பதால் இராணுவத் தலையிட்டால் பக்தர்கள் மத்தியில் அச்சம் தோன்றியுள்ளது. திருவிழாக்களை இரவில் நடத்த இராணுவம் அனுமதிக்குமா என்பது முக்கிய கேள்வி.
கோயில் திருவிழா காலத்தில் தமிழ் முஸ்;லிம் வர்த்தகர்கள் கோயிலைச் சுற்றி தற்காலிகக் கொட்டகை அமைத்து வியாபாரம் செய்வார்கள். இதனால் நில வாடகைப் பணத்தின் மூலம் யாழ் மாநகர சபை நல்ல நிதி வருவாயைப் பெற்றது. இனிமேலும் இது சாத்தியப் படுமா என்பது அடுத்த கேள்வி