இலங்கை போர்க்குற்ற வீடியோ - ஐ நா அதிகாரி கிறிஸ்டாப் ஹெய்ன்ஸ் பேட்டி

பிரிட்டனின் சனல் 4 தொலைக்காட்சியால் ஒளிபரப்பப்பட்ட இலங்கையின் இறுதிப் போர் குறித்த வீடியோ காட்சிகள் உண்மையானவை என்று ஐ.நாவின் மனித உரிமை கவுன்சிலுக்கு அறி்க்கை அளித்துள்ள சட்டவிரோதக் கொலைகளுக்கான ஐ.நாவின் சிறப்புத் தூதர் கிறிஸ்டாப் ஹெய்ன்ஸ் இந்த முடிவை தான் எப்படி அடைந்தேன் என்பதை விளக்கியுள்ளார்.
சட்டம்சார் தடயவியல் உடற்கூற்றுவியல் நிபுணர், ஒளி மற்றும் ஒலி வல்லுநர்கள், வெடிகுண்டு சிறப்பு நிபுணர் ஆகியோர் அந்த ஒளிப்படத்தை ஆராய்ந்தனர் என்றும், அவர்கள் அளித்த சான்றுகளின் அடிப்படையிலேயே இந்த முடிவு எட்டப்பட்டது என்றும் ஐ நா வின் சிறப்பு பிரதிநிதி கிறிஸ்டாப் ஹெயின்ஸ் தெரிவித்துள்ளார்.

சர்ச்சைக்குரிய அந்த ஒளிநாடாவில் ஐந்து வேறுபட்ட காட்சித் தொகுப்புகள் இருக்கும் நிலையில், அவை இடமாற்றம் மட்டுமே செய்யப்பட்டுள்ளதே தவிர, அந்தக் காட்சிகள் மாற்றியமைக்கப்பட்டதற்கான எந்த ஆதாரமும் இல்லை என்று அதை ஆராய்ந்த நிபுணர்கள் தெரிவித்ததாகவும் ஹெயின்ஸ் கூறுகிறார்.

அந்த ஒளிநாடாவில் நிர்வாணமாக இருப்பவர்கள், போர் கைதிகளா அல்லது பொதுமக்களா என்பது தெரியாது என்றாலும் அவர்கள் முற்றிலும் பாதுகாப்பற்ற நிலையில் இருப்பது மட்டுமே உறுதியாகிறது என்றும் ஜெனீவாவில் இருக்கும் பிபிசி செய்தியாளர் இமோஜன் போக்ஸுக்கு அளித்த சிறப்பு பேட்டியில் கிறிஸ்டாப் ஹெயின்ஸ் தெரிவித்துள்ளா

கொடூரமான காட்சிகள்
இந்த ஒளிநாடாவில் பெண்கள் நிர்வாணமாக இருப்பது பதிவாகியுள்ளது. உள்ளாடைகள் தெளிவாகத் தெரிவதாகவும். அந்த வீடியோவை எடுத்தவர் பெண்களின் அந்தரங்க உறுப்புகள் மீது கவனம் செலுத்தி காட்சிகளை பதிவு செய்துள்ளதாகவும் கூறிய ஹெயின்ஸ், துப்பாக்கிச் சூட்டு சம்பவம் குறித்து விசாரணை நடத்தப்படும் போது பாலியல் ரீதியான குற்றங்கள் நடைபெற்றதா என்பது குறித்தும் ஆராயப்பட வேண்டும் என்றும் கருத்து வெளியிட்டுள்ளார்.

இலங்கை அரசு சர்வதேச குற்றவியல் நீதிமன்றத்தை ஏற்காத நிலையில், ஐ.நாவின் மனித உரிமைக் கவுன்சலின் செயலாளர் நாயகத்தின் மட்டத்தில் இருக்கும் ஒருவர் ஒரு விசாரணை கமிஷனை நியமிக்கலாம் என்றும் அந்த விசாரணைக் குழுவுக்கு சாட்சியங்களை பதிவு செய்யவும் ஆதாரங்களை திரட்டுவதற்கும் அதிகாரங்கள் கொடுக்கப்பட்டிருக்க வேண்டும் என்றும் சிறப்புத் தூதர் யோசனை கூறினார்.

போர் குற்றம்
இந்த வீடியோவில் பதிவாகியுள்ள காட்சிகள் போர்க் குற்றம் தொடர்பான - மனித குலத்துக்கு எதிரான குற்றம் தொடர்பான ஒரு உதாரணம் என்று குறிப்பிட்ட அவர் இனியும் இந்த விடயம் தொடர்பாக சர்வதேச சமூகம் பாரமுகமாக இருக்க முடியாது என்றும் தெரிவித்தார்,

ஆனால் இந்த வீடியோக்கள் பொய்யானவை மாற்றம் செய்யப்பட்டவை எனவே இது குறித்து மேலதிக விசாரணை தேவையில்லை என்றே இலங்கை அரசு தொடர்ந்து கூறிவருகிறது.