பொலிஸார் தன்னிச்சையாகவே துப்பாக்கி பிரயோகம் நடத்தினர்

கட்டுநாயக்க சுதந்திர வர்த்தக வலய ஊழியர்கள் மீது துப்பாக்கிப் பிரயோகம் செய்வதற்கு மேலிடத்தில் இருந்து எவ்வித உத்தரவும் வழங்கப் பட்டிருக்க வில்லை. ஊழியர் களுக்கும் பொலி ஸாருக்கும் இடையில் ஏற்பட்ட மோதலின் போது சில பொலிஸார் தன்னிச்சையாகவே துப்பாக்கிப் பிரயோகம் செய்துள்ளனர்.இது குறித்து ஜனாதிபதி மஹிந்த ராஜபக்ஷ அவர்கள் நியமித்துள்ள தனிநபர் ஆணைக்குழு விசாரணைகளை ஆரம்பித்துள்ளதாக அமைச்சரவை பேச்சாளர் அமைச்சர் கெஹலிய ரம்புக்வெல்ல கூறினார்.

கட்டுநாயக்கவில் வேண்டுமென்றே குழப்பநிலை ஏற்படுத்தப்பட்டது. இதன் பின்னணியில் ஜே. வி. பி. யே உள்ளது. 1988- 89 காலப் பகுதி போன்ற அராஜக நிலையை ஏற்படுத்தும் நோக்கத்துடனேயே இவ்வாறு குழப்பநிலை ஏற்படுத்தப்பட்டதாக சந்தேகம் எழுவதாகக் கூறிய அமைச்சர், அது தொடர்பில் விரைவில் அம்பலப்படுத்தப்படும் என்றும் தெரிவித்தார்.

அமைச்சரவை முடிவுகளை அறி விக்கும் ஊடகவிய லாளர் மாநாடு நேற்று அரசாங்க தகவல் திணைக்களத்தில் நடைபெற்றது. ஊடக வியலாளர் ஒருவர் எழுப்பிய கேள்விக ளுக்குப்

பதிலளித்த அமைச்சர், கட்டுநாயக்க சம்பவம் குறித்து தெளிவுபடுத்தினார்.

தனியார் ஓய்வூதியத்திட்டம் குறித்து இறுதி முடிவு எடுக்கப்படாத நிலையிலேயே ஆடைத் தொழிற்சாலை ஊழியர்கள் எதிர்ப்பு ஆர்ப்பாட்டத்தில் ஈடுபட்டனர். இதனையடுத்தே ஆடைத் தொழிற்சாலை ஊழியர்களை இந்த ஓய்வுதியத் திட்டத்தில் சேர்த்துக்கொள்ளாதிருக்க முடிவு செய்யப்பட்டு அது குறித்து அவர்களுக்கு அறிவிக்கப்பட்டது. ஆடைத்தொழிற்சாலை ஊழியர்கள் 5.6 வருடங்களே பணியாற்றுகின்றனர். அந்த நேரத்தில் குழப்பநிலை மோசமடைந்திருக்கவில்லை.

தமது போராட்டம் வென்றதாக கோஷமெழுப்பியவாறு ஊழியர்கள் கடமைக்குத் திரும்ப முற்பட்ட போதே பொலிஸார் மீது கற்களாலும் தடிகளதலும் தாக்குதல்கள் நடத்தப்பட்டன. பொலிஸார் ஓடிய போது பொலிஸ் நிலையங்களுக்குள்ளும் புகுந்து தாக்குதல் நடத்தப்பட்டது. அப்பொழுது பொலிஸாரிடம் ஆயுதம் இருக்கவில்லை.

இந்த நிலையிலேயே நிலைமையை சமாளிக்க மேலதிக பொலிஸார் வரவழைக்கப்பட்டனர். தமது மேலதிகாரிகளை தாக்குவதை தாங்க முடியாமல் பொலிஸார் துப்பாக்கிப் பிரயோகம் செய்திருக்கலாம். ஆனால் தொழிலாளர்கள் மீது துப்பாக்கிப் பிரயோகம் செய்யப்பட்டதை நாம் அனுமதிக்கவில்லை.

துப்பாக்கிப் பிரயோகம் செய்ததாக சந்தேகிக்கப்படும் இரு பொலிஸார் கைது செய்யப்பட்டுள்ளதோடு சம்பவம் நடைபெற்ற அரை மணி நேரத்திற்குள் ஜனாதிபதி தனிநபர் ஆணைக்குழுவொன்றை நியமித்தார்.

இதற்கு முன்னரும் ஆர்ப்பாட்டாளர்களின் போது துப்பாக்கிப் பிரயோகம் மேற்கொள்ளப்பட்டு ஆர்ப்பாட்டக்காரர்கள் இறந்துள்ளனர். ஆனால் இவ்வாறு குறுகிய காலத்தினுள் நடவடிக்கை எடுக்கப்பட்டது கிடையாது.

உச்ச நீதிமன்ற முன்னாள் நீதியரசர் மகாநாம திலகரத்ன தலைமையிலான குழு விசாரணைகளை ஆரம்பித்துள்ளது. சம்பந்தப்பட்டவர்களிடம் சாட்சியங்கள் பதியப்பட்டு வருகின்றன. 5 நாட்களுக்குள் ஆணைக்குழுவின் அறிக்கை ஜனாதிபதியிடம் கையளிக்கப்படும். இந்தத் தாக்குதலுடன் தொடர்புடைய 40-50 பேர் கைதானதோடு சிலர் விடுவிக்கப்பட்டுள்ளனர்.

அரசியலில் வங்குரோத்து நிலை அடைந்துள்ள ஜே. வி.பி. மீண்டும் 1988- 89 போன்று கிளர்ச்சி யுகத்தை உருவாக்கும் முயற்சியாக இத்தகைய குழப்பங்களை ஏற்படுத்துகின்றதா என்ற சந்தேகம் ஏற்பட்டுள்ளது. தொழிற்சாலைகளை மூடிவிட ஜே. வி.பி. முயல்கிறது.

யுத்தம் முடிவடைந்து பொருளாதாரம் 8.5 வீத வளர்ச்சியை எட்டியுள்ளது. வேலையின்மைக்குத் தீர்வு காணப்பட்டுவருவதோடு சுற்றுலாத்துறை அபிவிருத்தி அடைந்து வருகிறது. இந்த நிலையை தடுக்க அராஜக வழிகள் மூலம் ஜே. வி. செயற்படுவதாக தெரிகிறது.

ஆனால் வரலாற்றில் முதற்தடவையாகவே இத்தகைய குழப்பநிலையின் போது துரித நடவடிக்கை எடுக்கப்பட்டுள்ளதோடு பொலிஸாரின் தவறை ஏற்று பொலிஸ் மா அதிபரும் ஓய்வு பெற்றுள்ளார்.

இதற்கு முன்னரும் பொலிஸ்மா அதிபர்களின் காலம் முடிவடைந்த பின்னர் ஓரிரு வருட பதவி நீடிப்பு வழங்கப்பட்டுள்ளது. ஆனால் மஹிந்த பாலசூரிய அவ்வாறு பதவி நீடிப்பு கோராது பதவியில் இருந்து ஓய்வு பெற்றார்.

தற்பொழுது பதில் பொலிஸ் மா அதிபராக என். கே. இலங்ககோன் நியமிக்கப்பட்டுள்ளார். அடுத்த பொலிஸ் மா அதிபரை ஜனாதிபதி நியமிப்பார் என்றார்.

தனியார் ஓய்வூதியத் திட்டம் மீண்டும் கொண்டு வரப்படுமா என எழுப்பப்பட்ட கேள்விக்குப் பதிலளித்த அமைச்சர்,

தனியார் ஓய்வூதிய சட்டமூலம் இடைநிறுத்தப்பட்டுள்ளது. இது தொடர்பில் சுற்றுநிருபம் எதுவும் வெளியிடத் தேவையில்லை. இந்த சட்ட மூலம் பாராளுமன்றத்தில் சமர்ப்பிக்கப்பட்ட போதும் விவாதத்துக்கு எடுக்கப்படவில்லை. மீண்டும் இத்தகைய சட்டமொன்றை அரசுக்கு கொண்டு வரமுடியும். அதற்கு அரசாங்கத்துக்கு உரிமை உள்ளது. தனியார் துறையினருக்கு ஓய்வூதியத்திட்டமொன்று கொண்டு வருவதாக மஹிந்த சிந்தனையில் குறிப்பிடப்பட்டுள்ளது. தங்களுக்கு ஓய்வூதியம் தேவையில்லை என தனியார் ஊழியர்கள் கூறவில்லை.

ஆனால் அவசர பிரேரணையாக நாம் கொண்டுவரமாட்டேன்.

தினகரன்