பொலிஸார் கடமையின் போது துப்பாக்கி பயன்படுத்த தடையில்லை

பொலிஸார் கடமையின் போது
துப்பாக்கி பயன்படுத்த தடையில்லை




கே. அசோக்குமார்

பொலிஸ் உத்தியோகத்தர்கள் தங்கள் கடமை நிமித்தம் துப்பாக்கிகளை வைத்திருப்பதில்,
எடுத்துச் செல்வதில் எந்தவித தடையுமில்லை என பொலிஸ் மா அதிபர் என்.கே. இளங்ககோன்
அறிவித்துள்ளார்.
பொலிஸார் கடமைகளுக்குச் செல்லும் போது அதன் தேவைகளைப் பொறுத்து துப்பாக்கிகளை
வழங்கும் அதிகாரம் பிரதேசத்துக்குப் பொறுப்பான பிரதி பொலிஸ் மா அதிபர் முதல் பொலிஸ்
பொறுப்பதிகாரிக்கு அதிகாரம் வழங்கப்பட்டுள்ளது எனவும் பொலிஸ் மா அதிபர்
அறிவித்துள்ளதாக பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சகர் மெக்ஷி
புரொக்டர் தெரிவித்தார்.
கடமை நிமித்தம் செல்லும் பொலிஸ் உத்தியோகத்தர்களுக்கு துப்பாக்கிகள், வழங்குவது,
அதன் பாவனை தொடர்பாக பொலிஸ் அதிபரினால் சுற்று நிருபங்களும், ஆலோசனைகளும் பல
சந்தர்ப்பங்களில் வெளியிடப்பட்டுள்ளன. பொலிஸ் நிலையங்களுக்கு துப்பாக்கிகள்
வழங்குதல் மற்றும் பாவனை தொடர்பாக பொலிஸ் மா அதிபர் 2011.09.26 ஆம் திகதியும் பொலிஸ்
உத்தியோகத்தர்கள் துப்பாக்கிகள் சகிதம் செய்யும் கடமைகள் எவை என்பது பற்றியும்
2011.10.04 ஆம் திகதியும் முன்னைய அறிவித்தல்களை மீண்டும் வெளியிட்டுள்ளார்.
இதன்படி பொலிஸ் உத்தியோகத்தர்கள் துப்பாக்கிகளை எடுத்துச் செல்வதற்கு எதுவித
தடையுமில்லை. அவர்களது கடமையின் தேவைக்கு ஏற்ப ஆயுதங்களை எடுத்துச் செல்வதற்குரிய
அதிகாரம் அந்தந்த மாகாண, மாவட்ட பிரதி பொலிஸ் மா அதிபர்களுக்கும், பொலிஸ்
பிரிவுக்குரிய சிரேஷ்ட பொலிஸ் அத்தியட்சகர்களுக்கும் பொலிஸ் நிலைய
பொறுப்பதிகாரிகளுக்கும் பொலிஸ் மா அதிபர் உரிய பணிப்புரைகளையும் வழங்கியுள்ளார்.
தனது பணிப்பிற்கமைய பொலிஸ் பொறுப்பதிகாரிகளின் நடவடிக்கைகள் எடுக்க வேண்டும் என்றும்
அவர்கள் எடுக்கும் நடவடிக்கைகளை பிரதேசத்துக்கு பொறுப்பான பிரதி பொலிஸ் மா அதிபர்கள்
கண்காணிக்க வேண்டும் என்றும் பொலிஸ் மா அதிபர் என். கே. இளங்ககோன் அறிவித்துள்ளார்.
கடமையிலீடுபட்டுள்ள பொலிஸ் உத்தியோகத்தர்களுக்கு துப்பாக்கிகள் பாவனைக்கு தடைகள்
இருப்பதாக மக்கள் மத்தியில் ஒரு எண்ணம் தோன்றியிருப்பின் அது உண்மைக்கு புறம்பானது
எனவும் பொலிஸ் ஊடகப் பேச்சாளர் தெரிவித்தார்.