ஆயுதப்போராட்டம் படத்தில் இயக்குனராக களம் இறங்கிய ஜெய் ஆகாஷ்

தெலுங்கு சினிமாவில் தனக்கென தனி இடத்தை பிடித்தாலும், தமிழ் சினிமாவில் வெற்றி நாயகனாக வலம் வர வேண்டும் என்று போராடி கொண்டிருக்கிறார் ஜெய் ஆகாஷ்.
இந்த முறை எப்படியாவது வென்றாக வேண்டும் என்று தனக்கு தேவையான கதையை தானே உருவாக்கி இயக்குனராகவும் களம் இறங்கியிருக்கிறார்.



ஒரு இந்தியத் தமிழனுக்கும், இலங்கைத் தமிழனுக்குமான உணர்வுப் போராட்டத்தை கருவாக கொண்டு ஜெய் ஆகாஷ் உருவாக்கியிருக்கும் இந்த படத்திற்கு தலைப்பு "ஆயுதப் போராட்டம்". படத்தின் தலைப்பை போலவே படத்தையும் ரொம்ப தீவிரமாக சூட் பண்ணியிருக்கிறார் ஜெய் ஆகாஷ். இதற்காக தாய்லாந்து நாட்டின் ராணுவ உதவியுடன் தாய்லாந்தின் காஞ்சனாபுரி காட்டில் படப்பிடிப்பை நடத்தியிருக்கிறார்.

போராளிகள் பயன்படுத்துவது போன்ற கண்ணி வெடி உள்ளிட்ட ஆயுதங்கள் அனைத்தையும் உண்மையானதாக இந்த படத்தில் பயன்படுத்தியிருக்கிறார்கள். அதற்காகவே ராணுவத்தின் உதவியோடு படப்பிடிப்பையும் நடத்தியிருக்கிறார்கள்.

தாய்லாந்து நாட்டில் படப்பிடிப்பை நடத்திய ஜெய் ஆகாஷ், லண்டன், பிரான்ஸ், ஜேர்மனி போன்ற நாடுகளில் பாடல் காட்சியை படம் பிடித்திருக்கிறார். படத்தில் நிறைந்திருக்கும் ஆக்ஷன் காட்சிகளைப் போலவே காதல் காட்சிகளும் ரசிகர்களை திருப்திப்படுத்தும் வகையில் அமைந்திருக்கிறதாம். அதை சமீபத்தில் நடைபெற்ற இப்படத்தின் பாடல்கள் மற்றும் ட்ரைலர் வெளியீட்டு விழாவில் திரையிடப்பட்ட பாடல் காட்சிகள் நிரூபித்தது.

இப்படி காதல், சண்டைகாட்சிகள் நிறைந்த ஒரு கொமர்ஷியல் படமாக ஆயுதப் போராட்டம் உருவானாலும், உலக தமிழர்களை இப்படம் தட்டி எழுப்பும் என்கிறார் ஜெய் ஆகாஷ்.