இன்றைய ஹதீஸ் (09-06-2011)

by **நேசமுடன் ஹாசிம்** Thu 9 Jun 2011 - 14:15

(இஸ்லாத்தைத் தழுவ) யமன் தேசத்தவர் (அல்லாஹ்வின் தூதர் ஸல்லல்லாஹ் அலைஹி வஸல்லம் அவர்களிடம்) வந்தனர். அவர்கள் இரக்கம் கொண்ட இதயங்களையும், 1மெல்லிய மனங்களையும் உடையவர்களாவர். “ஈமான் யமனைச் சேர்ந்ததாகும் (யமன் வாசிகள் விரைவாக விசுவாசங் கொண்டனர்) ஹிக்மத்2தும் யமனைச் சேர்ந்ததாகும். அமைதி என்பது ஆட்டுக்கு சொந்தக்காரர்களிடம் (ஏழைகளிடம்) இருக்கிறது. பெருமையும், அகம்பாவமும், சூரிய உதயத்திற்கு முன்பே பெரும் சப்தத்தை எழுப்புவார்களே அத்தகைய ஒட்டகங்களையும் குதிரைகளையும் சொந்தமாகக் கொண்டவர்களிடம் இருக்கிறது.” என அல்லாஹ்வின் தூதர் ஸல்லல்லாஹ் அலைஹி வஸல்லம் அவர்கள் கூற தான் கேட்டதாக அபூஹுரைரா ரளியல்லாஹ் அன்ஹு அறிவிக்கிறார்கள்.

குறிப்பு:

1. அவர்களின் இதயத்தின் உட்பகுதிகூட, அல்லாஹ்வின் பயத்தைப்பற்றி எடுத்துக்கூறப்படும்போது அதை துரிதமாக ஏற்கக்கூடிய நிலையில் உள்ளது என்பதை தெரிவிக்கவே மெல்லிய மனங்களை உடையவர்கள் என வர்ணிக்கப்பட்டுள்ளது. ஷரஹ் நவவீ. பாகம் 2 பக்கம் 34

2.“ ஹிக்மத் ” என்பதற்கு பல விளக்கங்கள் கூறப்பட்டுள்ளது.

a. மனதை பக்குவப்படுத்தி அம்மனதில் உண்மையை உறுதிப்படுத்தி செயல்படுவதும், மனம்போன போக்கு, உண்மைக்கு மாற்றமானவற்றை கொள்கையாக ஏற்றல் ஆகியவைகளைத் தடுத்துக்கொண்டு, அல்லாஹ்வைப்பற்றி அவன் கூறியவற்றையெல்லாம் மனதில்கொண்டு அவன் கூறிய தெளிவில் அவனைத்தெரிந்துகொள்ளும் வகையைத்தான் “ஹிக்மத் ” எனக் கூறப்பட்டுள்ளது. ஷரஹ் நவவீ. பாகம் 2 பக்கம் 33

b தெளிவான இதயசுத்தியோடு கேட்கப்பட்ட விஷயங்கள் மனதில் பதிந்து செயல்படும்போது மனிதன் தவறிழைப்பது குறைந்துவிடலாம். அந்நிலையிலிருக்கும்போது “ஹிக்மத்” துடையவர் எனக் கூறலாம்.

c மனிதர்களுக்கு மத்தியில் உள்ள முறைப்படி “சாதுர்யம்” என்ற பொருளைக்கூறலாம்.
d நாட்டுபாஷையில் யூனானீவைத்தியம் செய்பவர்களை “ஹக்கீம்” என்கிறார்கள் என்பதும் ஒரு பொருள்.