கொலிவுட்டில் மிகவும் எதிர்பார்க்கப்படும் படமாக மங்காத்தா

by **sadir** Tue 28 Jun 2011 - 17:13

அஜித்தின் ஐம்பதாவது படமான ”மங்காத்தா” ஓகஸ்ட் மாதம் 15 ம் திகதிக்குள் வெளிவர இருக்கிறது.
தற்போது கிடைத்துள்ள அதிகாரப்பூர்வ தகவலின்படி மூன்று நாட்களுக்கு முன்னதாகவே, அதாவது ஓகஸ்ட் 12 ம் திகதியே வெளியீடு செய்யப்பட இருக்கிறதாம்.

இப்படத்தின் தயாரிப்பாளரான தயாநிதி அழகிரியை தொடர்பு கொள்ளும் ரசிகர்கள் எல்லோரும் ”மங்காத்தா” வெளியீடு எப்போது? எப்போது? என்ற கேள்விகளால் துளைத்தெடுக்கின்றனராம். இதற்காக தனது டுவிட்டர் இணைய பக்கத்தில் நேற்று அவர் பதில் அளித்ததாவது, ”மங்காத்தா” படக்குழுவினர் அனைவரும் ஓகஸ்ட் 12 ம் திகதி வெளியீடு செய்வதற்காக கடுமையாக உழைத்து வருகிறார்கள்.

கொலிவுட்டில் இப்போது மிகவும் எதிர்பார்க்கப்படும் படமாக ”மங்காத்தா” இருக்கிறது. சில ஆண்டுகளாகவே சீரியஸ் தொனி படங்களில் நடித்து வரும் அஜித், வேண்டி விரும்பி வெங்கட் பிரபுவின் கொமெடி ட்ரீட்மெண்ட் திரைக்கதையைத் தேர்ந்தெடுத்து நடித்துக் கொண்டிருக்கிறார்.

”எல்லோரும் கெட்டவன்னா நான் ரொம்ப கெட்டவன்” இதுதான் படத்தில் அஜித்துக்கான பஞ்ச் வரிகள். ரஜினியின் வெற்றியான ”ராமன் ஆண்டாலும் ராவணன் ஆண்டாலும் எனக்கொரு கவலை இல்லை” பாடலின் சில வரிகள் ரீ-மிக்ஸில் துவங்குகிறது. ”ஒரு அம்பானி பரம்பரை, அஞ்சாவது தலைமுறை ஆனந்தம் ஒரு முறை தான்” என்று அஜித் பாணிக்கு மாறுகிறது பாடல்.

படத்தில் அஜித்தின் கதாபாத்திரம் பெயர் வெங்கட் பிரபுவுக்கே தெரியாததாக இருந்ததாம். என்ன பெயர் வைக்கப் போறேன்னு அஜித் கேட்டுக் கொண்டே இருந்தாராம், இப்போது கதாபாத்திரத்திற்கு பெயர் வைக்கப்பட்டுள்ளது. ஆனால் அது மட்டும் ரகசியம்.