மருந்து கொள்வனவுக்கு குறைவின்றி நிதி ஒதுக்கீடு

மருந்து கொள்வனவுக்கு குறைவின்றி நிதி ஒதுக்கீடு

அரசாங்க ஆஸ்பத்திரிகளுக்குத் தேவையான மருந்து வகைகளைக் கொள்வனவு செய்வதற்கென குறைவின்றி நிதியொதுக்கீட்டை மேற்கொள்வதற்கு அரசாங்கம் தீர்மானித்திருப்பதாக சுகாதார அமைச்சர் மைத்திரிபால சிறிசேன நேற்று தெரிவித்தார்.

அரசாங்க ஆஸ்பத்திரிகளில் வெளிநோயாளர் சிகிச்சைப் பிரிவுகள் (ஓ. பி. டி) தினமும் இரவு 8 மணிவரை திறந்து வைக்கப்பட்டிருப்பதால் மருந்து வகைகளின் தேவை 33 சதவீதத்தால் அதிகரித்திருப்பதாகவும் அவர் குறிப்பிட்டார்.

இது தொடர்பாக மேலும் கூறுகையில்,

இலவச மருத்துவ சேவையை மஹிந்த சிந்தனையின் கீழ் விரிவுபடுத்துவதற்கு அரசாங்கம் பல வேலைத்திட்டங்களை முன்னெடுத்துள்ளது. அந்த வகையில் அரசாங்க ஆஸ்பத்திரிகளில் வெளிநோயாளர் சிகிச்சைப் பிரிவுகளில் தினமும் இரவு 8 மணிவரையும் சேவை வழங்குவதற்கு ஜனாதிபதி மஹிந்த ராஜபக்ஷ அவர்கள் நடவடிக்கை எடுத்திருக்கின்றார்.

மக்களின் நலன்களைக் கருத்தில்கொண்டு மேற்கொள்ளப்பட்டிருக்கும் இந்நடவடிக்கையின் பயனாக மக்கள் பெரிதும் நன்மையடைந்து வருகின்றனர். இதனால் மருந்துப் பொருட்களின் தேவை 33 சதவீதத்தால் அதிகரித்துள்ளது.

அரசாங்கம் ஆஸ்பத்திரிகளுக்கு மருந்துப் பொருட்களை கொள்வனவு செய்யவென கடந்த காலங்களில் வருடத்துக்கு 12 ஆயிரம் மில்லியன் முதல் 14 ஆயிரம் மில்லியன் ரூபா வரையான நிதியே ஒதுக்கப்பட்டது. ஆனால் கடந்த ஆறு மாதங்களில் மாத்திரம் மருந்துப் பொருள் கொள்வனவுக்கென 16 ஆயிரம் மில்லியன் ரூபாவை வழங்கியுள்ளது.

ஆஸ்பத்திரிகளில் மருந்துப் பொருட்களுக்கு எதுவிதமான தட்டுப்பாடும் ஏற்பட அரசாங்கம் ஒருபோதும் இடமளிக்காது.

மருந்து வகைகளின் கொள்வனவுக்குத் தேவைப்படும் நிதியைக் குறைவின்றி வழங்குவதற்கு அரசாங்கம் தீர்மானித்துள்ளது என்றார்.