சந்தேக நபரை ஒப்படைக்கக் கோரி பொலிஸ் நிலையம் மீது தாக்குதல்

சந்தேக நபரை ஒப்படைக்கக் கோரி பொலிஸ் நிலையம் மீது தாக்குதல்
இறக்காமத்தில் பதற்றம்
அம்பாறை மத்திய குறூப், இறக்காமம் தினகரன் நிருபர்கள்
கிaஸ் மனிதன் என சந்தேகிக்கப்படும் நபர் ஒருவர், வரிப்பத்தான் சேனைப் பகுதியில் உலாவுவதாக கிடைத்த தகவலுக்கிணங்க சில இளைஞர்களால் குறித்த நபர் பிடிக்கப்பட்டு இறக்காமம் பொலிஸ் நிலையத்தில் ஒப்படைக்கப்பட்டார்.

பின்னர் அவரை, மீண்டும் தம்மிடம் ஒப்படைக்குமாறு கோரி, சுமார் 800 க்கும் மேற்பட்ட மக்கள் ஒன்று திரண்டு இறக்காமம் பொலிஸ் நிலையம் மீது கடும் தாக்குதலை மேற்கொண்டனர்.இதனால் தமண பொலிஸ் நிலைய பொறுப்பதிகாரி உட்பட பொலிஸார் பலத்த காயமடைந்ததுடன், 2 பொலிஸ் ஜீப் வண்டிகளும் சேதத்துக்குள்ளாகின.

இந்தச் சம்பவம் நேற்று முன்தினம் இரவு 11.00 மணி தொடக்கம் நேற்று (வியாழன்) அதிகாலை வரை நடைபெற்றது.

கடந்த சில தினங்களாக இறக்காமம், வரிபத்தான்சேனை பிரதேசங்களில் இரவு 9.00 மணிக்குப் பின் மர்ம மனிதர்களின் நடமாட்டம் இருப்பதாகவும் இம் மர்ம மனிதர்கள் வீடுகளுக்குள் சென்று பெண்களைத் துன்புறுத்தி வருவதாகவும், பாதிக்கப்பட்டவர்கள் கூறி வருகின்றனர். இதனால் இப் பிரதேச மக்கள் மத்தியில் பெரும் பதற்றமும், பீதியும் நிலவுவதுடன் இரவானதும் மக்கள் வீடுகளை விட்டு வெளியே செல்ல முடியாத நிலைக்கும் தள்ளப்பட்டனர்.

இந் நிலையிலே நேற்று முன்தினம் இரவு இப் பிரதேசத்திற்கு பரிச்சயமற்ற சந்தேக நபர் ஒருவர் உலாவுவதைக் கண்டதும் சில இளைஞர்கள் அவரைப் பிடித்து இறக்காமம் பொலிஸ் நிலையத்தில் ஒப்படைத்தனர்.

இதனையடுத்து மர்ம மனிதன் பிடிக்கப்பட்டதாக தகவல் அறிந்த பொதுமக்கள் ஆவேசத்துடன் பொலிஸ் நிலையத்தில் ஒன்று திரண்டு குறித்த நபரை தம்மிடம் ஒப்படைக்குமாறு கோரி கோஷமெழுப்பினர்.

இதனால் பொலிஸாரின் விசாரணைக்கும் இடைஞ்சல் ஏற்பட்டதுடன், பொலிஸ் நிலையத்திற்குள்ளே சென்று அவரை பலாத்காரமாக கொண்டு செல்லவும் முயற்சித்தனர்.

ந் நிலையில் பொலிஸாருக்கும் பொது மக்களுக்குமிடையில் பாரிய முறுகல் நிலை ஏற்பட்டிருந்தவேளை தகவல் அறிந்து ஸ்தலத்திற்கு விரைந்த தமண பொலிஸ் நிலைய பொறுப்பதிகாரி தலைமையிலான விஷேட பொலிஸ் குழுவினர், பொலிஸ் நிலையத்திலிருந்து சகலரையும் வெளியேற்ற முற்பட்டயடுத்து பொதுமக்கள் வெளியேறிச் சென்று பொலிஸார் மீது சரமாரியாக கற்களை வீசினர்.

கல் வீச்சு தொடர்ந்தும் நாலா பக்கங்களிலிருந்தும் கடுமையாக இருந்ததுடன், பொலிஸாரும், பொலிஸ் நிலையத்தில் அகப்பட்டுக் கொண்ட நலன்விரும்பிகள் பலரும் திக்குமுக்காடினர்.

பின்னர் பொலிஸாரும் பதிலுக்கு தொடர்ச்சியான துப்பாக்கி வேட்டுக்களை தீர்த்துக் கொண்டே இருந்தனர். சுமார் 11 மணிக்கு ஆரம்பமான இச்சமர், நேற்று அதிகாலை 2.00 மணி வரை நீடித்தமையால் இறக்காமம் பிரதேசமே அதிர்ந்தது.

வீதிகள் எங்கும் சனக் கூட்டம் நிரம்பி வழிந்திருந்தது. வீதிகள் எங்கும் டயர்கள் எரித்து புகை மூட்டமாகி காணப்பட்டது. இதனையடுத்து வரிப்பத்தான்சேனை இறக்காமம் ஜும்ஆ பள்ளி தலைவர்களான அல்ஹாஜ், எஸ். உதுமாலெவ்வை, அல்ஹாஜ், ஏ. எல். எம். இஸ்மாயில், பிரதேச செயலர் யூ. நியாஸ், பிரதேச சபை உதவித் தவிசாளர் யூ. கே. ஜெபீர் மெளலவி, உறுப்பினர் எம். எல். முஸ்பி ஆகியோர் பொது மக்களை சாந்தப்படுத்தி பொலிஸ் நிலையத்திற்கு சென்று சமரச முயற்சிகளில் ஈடுபட்டனர்.

இச்சமரச முயற்சிகளில் அம்பாறை உதவிப் பொலிஸ் அத்தியட்சகர் சாமந்த விஜேரத்ன, அம்பாறை உதவிப் பொலிஸ் தலைமைப் பொறுப்பதிகாரி ஜயந்த ரத்நாயக்க ஆகியோரும் ஸ்தலத்திற்கு வருகை தந்தனர். குறித்த சந்தேக நபர் விளக்க மறியலில் வைக்கப்பட்டுள்ளதுடன் புலன்விசாரணைகளும் மேற்கொள்ளப்படுகின்றன.