தொடரை வெல்ல எமது அணி தயார் கிளார்க் துடுப்பாட்ட வீரர்கள் பொறுப்பாக ஆடும் பட்சத்தில் வெற்றி பெறுவோம்

"இலங்கை அணியின் சுழற்பந்து வீச்சாளர்களை எதிர்கொள்ள, எங்கள் வீரர்கள் நன்கு கற்றுக் கொண்டுள்ளனர். எங்களது "தொடர்' வெற்றி தொடரும் என்று நம்புகிறேன்,'' என, மைக்கல் கிளார்க் கூறியுள்ளார். இதேவேளை இன்றைய போட்டியில் எமது துடுப்பாட்ட வீரர்கள் பிரகாசிக்கும் பட்சத்தில் இப்போட்டியில் வெற்றிபெற முடியும் என இலங்கை அணித் தலைவர் டில்சான் தெரிவித்துள்ளார்.

இலங்கைக்கு சுற்றுலா மேற்கொண்டுள்ள அவுஸ்திரேலிய அணி, ஐந்து ஒருநாள் போட்டிகள் கொண்ட தொடரில் பங்கேற்று வருகிறது. முதல் இரண்டு போட்டிகளில் வெற்றி பெற்ற அவுஸ்திரேலிய அணி 2-0 என முன்னிலையில் உள்ளது. இரு அணிகள் இடையிலான மூன்றாவது ஒருநாள் போட்டி இன்று அம்பாந்தோட்டையில் நடக்கிறது. இதுகுறித்து அவுஸ்திரேலிய அணியின் தலைவர் மைக்கல் கிளார்க் கூறியது:

இலங்கை அணியில் சிறந்த சுழற்பந்து வீச்சாளர்கள் உள்ளனர். இவர்கள் அனைவரும் பந்தை, இரண்டு விதத்திலும் சுழற்றுவதில் வல்லவர்கள். இதனால் இவர்களுக்கு எதிராக சிறப்பான துடுப்பாட்டத்தை வெளிப்படுத்த வேண்டும் என்று நினைத்திருந்தோம்.

இதன்படி சுழற் பந்துவீச்சை நன்று கற்று, சிறப்பாக செயல்பட்டு, முதல் இரண்டு போட்டியில் வென்று, தொடரை நன்றாக துவக்கியது மகிழ்ச்சி. இதேபோல ஒவ்வொரு போட்டியிலும், திறமை வெளிப்படுத்த விரும்புகின்றோம். இந்த வெற்றி இன்றும் தொடர்ந்தால் நல்லது. இவ்வாறு மைக்கேல் கிளார்க் கூறினார்.

இன்றைய போட்டி குறித்து இலங்கை அணித் தலைவர் டில்சான் கூறுகையில்,"" ஒவ்வொரு போட்டியிலும் இருந்து ஒன்றை கற்றுக் கொள்கிறோம். முதல் இரண்டு ஆட்டங்களில் 191, 208 ஓட்டங்கள் தான் எடுத்தோம். அடுத்து வரும் போட்டிகளில் துடுப்பாட்ட வீரர்கள் பொறுப்பாக செயல்படும் பட்சத்தில், மீண்டு வருவோம் என்ற நம்பிக்கை உள்ளது,'' என்றார்.