ஆஸ்திரேலியா கோர்ட்டில் ராஜபக்சே மீது வழக்கு

by **நண்பன்** Thu 6 Oct 2011 - 8:55

இலங்கையில் விடுதலைப்புலிகளுக்கு எதிராக போரிட்ட சிங்கள ராணுவம்
பல்லாயிரக்கணக்கான அப்பாவி தமிழர்களை ஈவு இரக்கமின்றி கொன்று குவித்தது.
இந்த போர் விதி மீறல்களுக்கு உரிய வீடியோ ஆதாரங்கள் உள்ளன. இலங்கை அதிபர்
ராஜபக்சேயும் அவரது தம்பி கோதபயவும் திட்டமிட்டு தமிழர்களை கொன்றது,
வீடியோ ஆதாரங்கள் மூலம் உறுதிப்படுத்தப்பட்டுள்ளது. இந்த குற்றத்துக்காக
ராஜபக்சேயை தண்டிக்க வேண்டும் என்ற கோரிக்கையை உலகின் பல்வேறு நாடுகளும்
வலியுறுத்தி வருகின்றன.

இதற்கிடையே ராஜபக்சேக்கு
எதிராக அமெரிக்காவில் ஒரு வழக்கு தொடரப்பட்டுள்ளது. கொல்லப்பட்ட
விடுதலைப்புலி தளபதி ரமேசின் மனைவி, இந்த வழக்கை தொடர்ந்துள்ளார். இந்த
நிலையில் ஆஸ்தி ரேலியாவிலும் ராஜபக்சே மீது வழக்கு தொடரப்பட்டுள்ளது.
ராஜபக்சேயின் முகத்திரையை கிழித்து எறிவதற்காக இந்த வழக்கு நடவடிக்கை
மேற்கொள்ளப்பட்டுள்ளது. ஆஸ்திரேலியாவில் இந்த மாத இறுதியில் 28ந்தேதி முதல்
30-ந்தேதி வரை ஐ.நா.சபை மாநாடு நடைபெற உள்ளது. இதில் ராஜபக்சேயும் கலந்து
கொள்ள திட்டமிட்டுள்ளார்.

ஈழத்தமிழர்களுக்கு எதிரான
சில நகர்வுகளை அப்போது ராஜபக்சே மேற்கொள்ள இருப்பதாக கூறப்படுகிறது.
ராஜபக்சேக்கு உரிய பதிலடி கொடுக்க உலகத் தமிழர் பேரவை சில முயற்சிகளை
எடுத்து வருகிறது. அதன்படி ஆஸ்திரேலியாவில் ஐ.நா.சபை மாநாடு நடக்கும் அதே
காலக்கட்டத்தில் உலகத் தமிழர் பேரவை மாநாட்டையும் ஆஸ்திரேலியாவில் நடத்த
திட்டமிட்டுள்ளனர்.

இதன் மூலம் இலங்கையில்
ஈழத்தமிழர்களுக்கு எதிராக மேற்கொள்ளப்பட்ட அநீதிகள், அக்கிரமங்கள், கொலைகள்
பற்றி உலகத் தமிழர்களுக்கு விளக்க முடியும் என்று எதிர்பார்க்கப்படுகிறது.
சிட்னி கோர்ட்டில் வழக்கு தொடரும் பட்சத்தில் ராஜபக்சே மீதான பிடியை
இறுகச் செய்ய முடியும் என்று ஈழத்தமிழ் அமைப்புகளின் தலைவர்கள்
கருதுகிறார்கள்.