இலங்கை செல்லும் இந்திய வெளியுறவு செயலாளர் ஜெயலலிதாவுடன் இன்று சந்திப்பு

இந்திய வெளியுறவு துறை செயலாளர் ரஞ்சன் மாத்தை இன்று இலங்கை
செல்கிறார். 3 நாள் பயணமாக இலங்கை செல்லும் வழியில் இன்று மாலை 4.40
மணிக்கு சென்னை வருகிறார்.

இங்கு முதல்-அமைச்சர்
ஜெயலலிதாவை ரஞ்சன் மாத்தை கோட்டைக்கு சென்று சந்திக்கிறார். அப்போது தமிழக
மீனவர்கள் மீது இலங்கை ராணுவம் நடத்தும் தொடர் தாக்குதல் பற்றி கவலை
தெரிவித்து ஜெயலலிதா பேச உள்ளார்.

இதுதவிர இலங்கை
தமிழர் பிரச்சினை குறித்தும் இருவரும் விவாதிப்பார்கள் என தெரிகிறது.
இதன் பிறகு கோட்டையில் இருந்து சென்னை விமான நிலையத்துக்கு திரும்பி வரும்
ரஞ்சன் மாத்தை இரவு 9.15 மணிக்கு ஸ்ரீலங்கன் ஏர்லைன்ஸ் விமானத்தில்
கொழும்பு புறப்பட்டு செல்கிறார். அங்கு 10-ந் தேதி வரை அவர் தங்கி
இருக்கிறார்.

அப்போது இலங்கை அதிபர் ராஜபக்சே,
எதிர்க்கட்சி தலைவர் ரனில் விக்ரமசிங்கே, இலங்கை வெளியுறவு துறை செயலாளர்
ஆகியோரை சந்தித்து ஆலோசனை நடத்துகிறார்.

தமிழக
மீனவர்கள் மீது இலங்கை ராணுவம் அடிக்கடி தாக்குதல் நடத்துவதை நிறுத்துவது,
இலங்கை தமிழர்கள் மறு குடியமர்வு உள்பட பல்வேறு முக்கிய விஷயங்கள் பற்றி
விவாதிப்பார் என தெரிகிறது.