கடத்தப்பட்ட இத்தாலி கப்பலை இங்கிலாந்து, அமெ. படை மீட்பு

கடத்தப்பட்ட இத்தாலி கப்பலை இங்கிலாந்து, அமெ. படை மீட்பு
11 கடற்கொள்ளையர் கைது
கடற்கொள்ளையர்களால் கடத்தப்பட்ட இத்தாலி கப்பலை இங்கிலாந்து, அமெரிக்க படையினர் அதிரடியாக மீட்டனர். இதனால் 6 இந்தியர்கள் உட்பட 23 ஊழியர்கள் உயிருடன் மீட்கப்பட்டனர். 11 கடற் கொள்ளையர்கள் கைது செய்யப்பட்டனர்.

இங்கிலாந்தில் லிவப்பூல் துறைமுகத்தில் இருந்து இரும்பு மூலப்பொருட்களை ஏற்றிக்கொண்டு, ஒரு சரக்கு கப்பல், வியட்நாம் நாட்டை நோக்கி புறப்பட்டது. அது, இத்தாலி நாட்டைச் சேர்ந்த ஒரு தனியாருக்கு சொந்தமான ‘மோன்டெக்ரிஸ்டோ’ கப்பல் ஆகும். அதில் 6 இந்தியர்கள் உட்பட 23 ஊழியர்கள் இருந்தனர்.

ஜப்பான் கடற்படை கப்பலின் பாதுகாப்புடன் சென்ற அக்கப்பல், இந்திய பெருங்கடலுக்குள் நுழைந்தவுடன் தனியாக பிரிந்து சென்றது.

அப்போது படகில் வந்த சோமாலிய கடற்கொள்ளையர்கள் 5 பேர் அந்த கப்பலை கடத்திச் சென்றனர். 23 ஊழியர்களை பிணைக் கைதிகளாக பிடித்து வைத்துக்கொண்டனர்.

இந்நிலையில், கடற்பகுதியில் ரோந்து சுற்றி வரும் இங்கிலாந்து மற்றும் அமெரிக்க கடற்படை கப்பல்களில் இருந்த வீரர்கள், கடத்தப்பட்ட அந்த கப்பலுக்குள் அதிரடியாக புகுந்தனர். கப்பலில் இருந்த 11 கடற்கொள்ளையர்களை கைது செய்தனர். கடற்கொள்ளையர்களின் பிடியில் இருந்து கப்பலையும் 6 இந்தியர்கள் உள்ளிட்ட 23 சிப்பந்திகளையும் பத்திரமாக மீட்டனர்.