உலகம் முழுவதும் பெரும் வன்முறையாகும் வால் ஸ்டிரீட் ஆக்கிரமிப்பு போராட்டம் இந்தியாவிலும்

செல்வந்தர்களுக்கு மட்டுமே உபயோகமான வகையில் தீட்டப்படும் அமெரிக்கப் பொருளாதாரத் திட்டங்களுக்கு எதிராக நியூயார்க்கிலுள்ள வால்ஸ்டிரீட்டை மையமாக கொண்டு மக்கள் போராட்டம் வலுத்து வருகிறது.
அமெரிக்காவில் நிலவி வரும் பொருளாதார ஏற்றத்தாழ்வுக்கு எதிராக வால்ஸ்டிரீட்டில் மூன்று வாரங்களுக்கு முன்னர் இளைஞர்கள் ஒன்றுகூடி போராட்டம் ஆரம்பித்தது. இப்போராட்டம் இப்போது அமெரிக்காவின் பல பரவி வருவதோடு, வால்ஸ்டிரீட் முறையிலான தெரு கையகப்படுத்தும் போராட்டம் உலக நாடுகளிலும் பரவி வருகிறது.

.
அமெரிக்கப் பொருளாதார சரிவின்போது வங்கிகளுக்கு ஊக்கத்தொகை அளித்த அரசு, அதே சமயம் வேலை இழந்தோரைத் தவிக்க விட்டு விட்டது என்பதே இப்போராட்டத்தில் ஈடுபட்டுள்ளோரின் முக்கியமான குற்றச்சாட்டு!
"வால் ஸ்டிரீட் ஆக்கிரமிப்பு இயக்கம்" எனப் பெயரிடப்பட்டுள்ள இப்போராட்டத்திற்கு அமெரிக்கப் பேரறிஞர் நோம் சோம்ஸ்கி, "விக்கிலீக்ஸ்' நிறுவனர் ஜூலியன் அசாஞ்ச், உள்ளிட்ட பிரபலங்களும் ஆதரவு தெரிவித்துள்ளனர். வால்ஸ்டிரீட்டில் ஆரம்பித்த இந்தப் போராட்டம், நியூயார்க், பாஸ்டன், லாஸ் ஏஞ்சல்ஸ், சான் பிரான்சிஸ்கோ, சிகாகோ, மெம்பிஸ், மேரிலேண்ட் மாகாணத்தின் பால்டிமோர், மின்னசோட்டா மாகாணத்தின் மின்னபோலிஸ், ஹவாய் தீவின் ஹிலோ, டெக்சாஸ் மாகாணத்தின் மெக்அலன் ஆகிய நகரங்களிலும் பரவியுள்ளன. இப்போராட்டத்தை அமெரிக்கா முழுவதும் எடுத்துச் செல்ல இணையத்தின் சமூகவலை தளங்களும் பயன்படுத்தப்படுகின்றன.
கிட்டத்தட்ட எகிப்தில் நடந்த மக்கள் போராட்டத்துக்கு இணையான வகையில் அமெரிக்காவில் நடந்துவரும் போராட்டம், அடுத்தடுத்த நாட்களில் அமெரிக்க அரசுக்குப் பெரும் தலைவலியாக மாறும் எனக் கருதப்படுகிறது.

பூங்கா விவகாரம்: இந்நிலையில், நியூயார்க்கில், ஆர்ப்பாட்டக்காரர்கள் தங்கியுள்ள, தனியாருக்குச் சொந்தமான "ஜூகோட்டி பூங்காவில்' இருந்து ஆர்ப்பாட்டக்காரர்களை வெளியேற்றும் நோக்கில், அந்தப் பூங்காவைத் தூய்மைப்படுத்தப் போவதாக, பூங்கா உரிமையாளரான "ப்ரூக்பீல்டு பிராபர்ட்டீஸ்' நிறுவனம் அறிவித்தது.

மக்கள் எதிர்ப்பு: தூய்மைப்படுத்திய பின் ஆர்ப்பாட்டக்காரர்கள் பூங்காவில் மீண்டும் தங்கலாம் எனவும் கூறியிருந்தது. ஆனால், இதன் மூலம் தங்கள் ஆர்ப்பாட்டத்தை நசுக்க நியூயார்க் போலீசார் முயல்வதாகக் கருதிய ஆர்ப்பாட்டக்காரர்கள் இரண்டாயிரத்துக்கும் மேற்பட்டோர், பூங்காவில் நேற்று திரண்டு, அங்கிருந்து செல்ல முடியாது என தெரிவித்தனர்.

வாபஸ்: இதன் பின், கடைசி நேரத்தில், தனியார் நிறுவனம் வெளியிட்ட அறிக்கையில், பூங்காவை தூய்மைப்படுத்தும் நடவடிக்கை தள்ளி வைக்கப்பட்டுள்ளதாக தெரிவிக்கப்பட்டுள்ளது.

உலகம் முழுவதும்: இந்நிலையில், "வால் ஸ்டிரீட் ஆக்கிரமிப்பு போராட்டம்' உலகளவில் பரவி வருகிறது. தென்னாப்ரிக்கா, தென் அமெரிக்கா, கனடா, ஐரோப்பா, ஆசியா, தெற்காசியா, ரஷ்யா என உலகம் முழுவதும் போராட்டங்கள் நேற்று முதல் துவங்கின. இதற்காக,www.15october.net என்ற இணையதளம் துவக்கப்பட்டுள்ளது. இதில், உலகம் முழுவதும், இந்தியா உள்ளிட்ட 82 நாடுகளில், 951 நகரங்களில் "வால் ஸ்டிரீட் ஆக்கிரமிப்பு' போராட்டம் நடக்கப் போவதாக அறிவிக்கப்பட்டுள்ளது.

சிட்னியில், டோக்கியோவில்... முதற்கட்டமாக, ஆஸ்திரேலியாவின் சிட்னி, மெல்போர்ன் நகரங்களிலும், நியூசிலாந்தின் ஆக்லாண்ட், வெல்லிங்டன், கிறிஸ்ட்சர்ச் நகரங்களிலும், தைவான் தலைநகர் தாய்பெய்யிலும், ஜப்பானின் டோக்கியோ,ரோப்போங்கி நகரங்களிலும், தென்கொரியத் தலைநகர் சியோலிலும் நேற்று போராட்டங்கள் நடந்தன.

லண்டனில் அசாஞ்ச்: அதேநேரம்,ரோம், ஏதென்ஸ், மாட்ரிட் போன்ற நகரங்களிலும், தென்னாப்ரிக்காவின் டர்பன், கேப்டவுன், ஜோகன்னஸ்பர்க் நகரங்களிலும், ஜெர்மனியின் பிராங்பர்ட்டிலும் நேற்று போராட்டங்கள் நடந்தன. பிரிட்டன் தலைநகர் லண்டனில் நடந்த போராட்டத்தில் "விக்கிலீக்ஸ்' நிறுவனர் ஜூலியன் அசாஞ்ச் கலந்து கொண்டார். இத்தாலியின் ரோம் நகரில் நேற்று நடந்த போராட்டத்தில் வன்முறை வெடித்தது. கார்கள் தீக்கிரையாக்கப்பட்டன. கடைகள் அடித்து நொறுக்கப்பட்டன.

"இந்தியா ஆக்கிரமிப்பு' போராட்டம்? ஆக்கிரமிப்பு போராட்டங்களுக்கான www.15october.net இணையதளத்தில், இந்தியாவில் புனே, ஐதராபாத், மும்பை, கோல்கட்டா மற்றும் டெல்லியில் போராட்டங்கள் நேற்று நடக்க இருப்பதாகத் தெரிவிக்கப்பட்டிருந்தது. ஆனால், மும்பையில் போராட்ட ஒருங்கிணைப்பாளர்கள், "ட்விட்டரில்' இம்மாதம் 29ம் தேதி போராட்டம் நடக்கும் என அறிவித்திருந்தனர். பிற நகரங்களில் போராட்டங்கள் நடந்தது குறித்து தகவல்கள் தெரியவரவில்லை

வினை விதைத்தவன் வினைதான் அறுப்பான் .

உலக நாடுகளின் முதலீட்டார்கள் பணத்தை எல்லாம் விழுங்கி ஏப்பம் விட்டவர்கள் இந்த வால் ச்ட்ரீட் காரர்கள் இப்போது வினை அறுக்கிறார்கள்