இலங்கையுடனான முதல் டெஸ்ட்: பாகிஸ்தான் வலுவான நிலையில்

இலங்கையுடனான முதல் டெஸ்ட்: பாகிஸ்தான் வலுவான நிலையில்


பாகிஸ்தான் அணியின் ஆரம்பத் துடுப்பாட்ட வீரர்களின் சிறந்த இணைப்பாட்டத்தினால்
இலங்கை க்கு எதிரான முதலாவது டெஸ்ட் போட்டியில் பாகிஸ்தான் அணி ஒரு விக்கட்டை
மாத்திரம் இழந்து 259 ஓட்டங்களை பெற்று வலுவான நிலையில் உள்ளது.
நேற்றைய இரண்டாம் நாள் ஆட்டநேர முடிவில் பாகிஸ்தான் அணியின் ஆரம்பத்துடுப்பாட்ட
வீரர் தெளபீக் உமர் இலங்கைக்கு எதிராக தனது கன்னி டெஸ்ட் சதத்தை பூர்த்தி செய்தார்.
இலங்கை - பாகிஸ்தான் அணிகள் மோதும் டெஸ்ட் போட்டி டுபாயில் நடைபெறுகின்றது. முதலில்
துடுப்பெடுத்தாடிய இலங்கை அணி சகல விக்கட்டுகளையும் இழந்து 197 ஓட்டங்களை மாத்திரமே
பெற்றுக் கொண்டது. அவ் அணி சார்பாக அஞ்சலோ மெத்தியூஸ் ஆட்டமிழக்காமல் 52 ஓட்டங்களை
பெற்றுக் கொண்டார். பந்துவீச்சில் பாகிஸ்தான் அணி சார்பாக ஜூனைட் கான் 5
விக்கட்டுகளை பதம்பார்த்தார். சயிட் அஜ்மல், உமர் குல் ஆகியோர் தலா 2 விக்கட்டுக்கள்
வீதம் வீழ்த்தினர்.
அதனைத் தொடர்ந்து தனது முதலாவது இனிங்ஸை தொடர்ந்த பாகிஸ்தான் அணி நேற்று முன்தினம்
விக்கட் இழப்பின்றி 27 ஓட்டங்களை பெற்றிருந்தது.
நேற்று தனது இனிங்ஸை மீண்டும் ஆரம்பித்த பாகிஸ்தான் அணியின் ஆரம்ப துடுப்பாட்ட
வீரர்கள் முதலாவது விக்கட்டுக்காக 118 ஓட்டங்களைப் பகிர்ந்துகொண்டனர். இதேவேளையில்
ஹபீஸ் 75 ஓட்டங்களைப் பெற்றிருந்த போது ஹேரத்தின் பந்துவீச்சில் எல்.பி.டபிள்யூ
மூலம் ஆட்டமிழந்தார். அதனைத் தொடர்ந்து களமிறங்கிய தெளபீக் உமர் மற்றும் அசார் அலி
ஜோடி சிறந்த அடிதளத்தை ஏற்படுத்தினர். இவர்கள் இருவரும் இணைந்து இரண்டாவது
விக்கெட்டுக்காக 141 ஓட்டங்களைப் பெற்றனர்.
ஆரம்பத் துடுப்பாட்ட வீரர் தெளபீக் உமர் இலங்கைக்கு எதிராக தனது கன்னி சதத்தை
பூர்த்தி செய்தார். இவர் 8 பெளன்டரிகள் அடங்கலாக 109 ஓட்டங்களைப் பெற்று
ஆட்டமிழக்காமல் இருந்தார். அவருடன் துடுப்பெடுத்தாடி வரும் அசார் அலி 5 பெளன்டரிகள்
அடங்கலாக 60 ஓட்டங்களோடு களத்தில் உள்ளனர்.
இதன்படி பாகிஸ்தான் அணி 9 விக்கெட் கைவசம் உள்ள நிலையில் 62 ஓட்டங்கள் முன்னிலையில்
உள்ளமை குறிப்பிடத்தக்கது.
பந்து வீச்சில் ஹேரத் மாத்திரமே ஒரு விக்கட்டை வீழ்த்தியதுடன் ஏனைய
பந்துவீச்சாளர்கள் பெரிதளவில் சோபிக்கவில்லை. வேகப்பந்துவீச்சாளர்களுக்கு மிகவும்
சாதகமாக காணப்பட்டாலும் இலங்கை அணியின் வேகப்பந்துவீச்சாளர்கள் தங்கள் திறமையை
முழுமையாக வெளிப்படுத்தவில்லை என்றே கூற வேண்டும்.