வங்க கடலில் காற்றழுத்த தாழ்வு நிலை: தமிழ்நாட்டில் பருவமழை தீவிரம்; சென்னையில் இடியுடன் பலத்த மழை

வடகிழக்கு பருவமழை அக்டோபர் 3-வது வாரம் தொடங்கும் என்று
எதிர்பார்க்கப்பட்டது. இந்த நிலையில், தமிழ்நாடு மற்றும் புதுச்சேரியில்
நேற்று முதல் பருவமழை தொடங்கி விட்டதாக சென்னை வானிலை ஆய்வு மையம்
அதிகாரப்பூர்வமாக அறிவித்துள்ளது.

நேற்று
தமிழ்நாட்டில் பரவலாக மழை பெய்தது. சங்கரன்கோவிலில் அதிக பட்சமாக 10 சென்டி
மீட்டர் மழை பெய்தது. செங்குன்றத்தில் 9 செ.மீ., ஸ்ரீபெரும்புதூர்,
பண்ரூட்டி, பரங்கிப்பேட்டையில் தலா 7 செ.மீ., கொடைக்கானல், முத்துப்பேட்டை,
சாத்தான்குளத்தில் தலா 6 செ.மீ. மழை பெய்து இருக்கிறது. இது தவிர பல்வேறு
பகுதிகளில் இடியுடன் நல்ல மழை பெய்து இருக்கிறது.

சென்னையில்
நேற்று நல்ல மழை பெய்தது. இன்றும் இடி-மின்னலுடன் பலத்த மழை பெய்தது.
இதனால் ரோடுகளில் வெள்ளம் பெருக்கெடுத்து ஓடியது. மழை வெள்ளம் காரணமாக
முக்கிய சாலைகளில் போக்குவரத்து நெரிசல் ஏற்பட்டது. இரு சக்கர வாகனங்களில்
சென்றவர்கள் பெரும் அவதிக்குள்ளானார்கள். தாழ்வான பகுதிகளிலும் வெள்ளம்
தேங்கியது.

சென்னையில் இன்று காலை வரை
நுங்கம்பாக்கத்தில் 52.50 மில்லி மீட்டரும், மீனம்பாக்கத்தில் 37.20
மி.மீ.யும் மழை பதிவாகி உள்ளது. வங்க கடலில் மன்னார் வளைகுடா முதல்
தெற்கு ஆந்திரா கடல் பகுதி வரை காற்றழுத்த தாழ்வு நிலை பரவி உள்ளது. இதன்
காரணமாக தமிழ்நாட்டில் அனேக இடங்களில் மழை பெய்யும்.

தமிழ்நாடு
மற்றும் புதுச்சேரியில் ஆங்காங்கே பலத்த மழை பெய்யவும் வாய்ப்பு உள்ளது
என்று சென்னை வானிலை ஆய்வு மையம் இன்று தெரிவித்துள்ளது. நேற்று பருவமழை
தொடங்கியதில் இருந்தே தமிழ்நாடு-புதுச்சேரியில் பரவலாக மழை பெய்து
வருகிறது. தற்போது வங்க கடலில் காற்றழுத்த தாழ்வு நிலை உருவாகி இருக்கிறது.
இது மேலும் தீவிரம் அடைய வாய்ப்பு உள்ளது. எனவே பருவமழை தீவிரம் அடையும்
என்று எதிர்பார்க்கப்படுகிறது.

குமரி மாவட்டத்தில்
தொடர் மழை பெய்து வருகிறது. பேச்சிப்பாறை, பெருஞ்சாணி அணைகளின் நீர்மட்டம்
வெகுவாக உயர்ந்து வருகிறது. தஞ்சையில் நேற்று இரவு முதல் இன்று காலை வரை
நல்ல மழை பெய்து உள்ளது. அதிகபட்சமாக மதுக்கூரில் 44.6 மில்லி மீட்டர் மழை
பதிவாகி உள்ளது. இதேபோல் கரூர், குளித்தலை பகுதியிலும் மழை பெய்தது.
ராமநாதபுரம் மாவட்டத்தில் நேற்று பலத்த மழை பெய்தது. காலையில் லேசான மழை
பெய்தது. இரவில் பலத்த மழை கொட்டியது. விடிய, விடிய பலத்த மழை பெய்ததால்
தாழ்வான பகுதிகளில் மழைநீர் குளம் போல் தேங்கியது.