இந்தியாவின் முன்னுரிமைகள் வேறு:கேன்ஸ் மாநாட்டில் பிரதமர் உறுதி

"யூரோ' மண்டலத்தில் ஏற்பட்டுள்ள கடன் நெருக்கடி உலகளவில் பாதிப்பை ஏற்படுத்தினாலும், இந்தியா கவலைப்பட வேண்டிய விஷயங்கள் பல உள்ளதாக பிரதமர் மன்மோகன் சிங் தெரிவித்துள்ளார். "யூரோ' கடன் நெருக்கடி ஏற்படும் முன், இந்தியா திட்டமிட்டிருந்த முன்னுரிமைகளைக் கவனிப்பது தொடரும் எனவும் அவர் உறுதிபடக் கூறியுள்ளார்.

இதுகுறித்து அவர் நேற்று அளித்த பேட்டியில் கூறியதாவது:சமுதாயத்தில் குறைந்த வருமானம் உள்ளோர் மற்றும் விளிம்பு நிலையில் இருப்போர் ஆகியோருக்கான நிதிச் சேவைகளை குறைந்த செலவில் கொடுப்பது (பினான்சியல் இன்க்ளூஷன்), உட்கட்டமைப்பில் நீண்ட கால நிதி முதலீடு, "லிக்விட் பாண்ட்' சந்தைகளை மேம்படுத்துவது, அதன் மூலம் பணக் கொள்கையை மேம்படுத்துவது உள்ளிட்டவை தான், "யூரோ' கடன் நெருக்கடி ஏற்படுவதற்கு முன், இந்தியா திட்டமிட்டிருந்த நிதித் துறை இலட்சியங்கள் அல்லது முன்னுரிமைகள்.

இவைகளை மாற்றும்படியாக எந்தவொரு நடவடிக்கையும் இந்திய மற்றும் உலக பங்குச் சந்தைகளில் நிகழவில்லை. இனிமேலும் உலகளவில் ஏற்படும் சீர்திருத்தங்கள் இவைகளைத் தடுக்காது.இந்தியா கவலைப்பட வேண்டிய விஷயங்கள் பல இருக்கின்றன. குறிப்பாக வங்கி முதலீட்டுத் துறையை இன்னும் பலப்படுத்த வேண்டும்.இந்தாண்டு, பொருளாதார வளர்ச்சி சிறிது மந்தப்பட்டிருக்கிறது. நடப்பாண்டில் மொத்த உள்நாட்டு உற்பத்தியில் பொருளாதார வளர்ச்சி, 7.6 சதவீதத்தில் இருந்து 8 சதவீதம் வரை இருக்கும்.
உட்கட்டமைப்பில் முதலீடுகளைப் புதுப்பிப்பது, வரி சீர்திருத்தங்கள் மூலம் வருமானத்தை மேம்படுத்தி, அதன் மூலம், நிதிப் பற்றாக்குறையை குறைக்கும் முயற்சியை தொடர்ந்து மேற்கொள்வது ஆகியவை தான் இந்தியாவின் குறுகிய கால இலக்குகளாக உள்ளன.
இவ்வாறு பிரதமர் மன்மோகன் சிங் தெரிவித்தார்.