ஸ்பெக்ட்ரம் ஒதுக்கீட்டில் விதிமீறல்: டிராய் அமைப்பு தலைவர் சர்மாவிடம் சி.பி.ஐ. விசாரணை

2ஜி ஸ்பெக்ட்ரம் ஒதுக்கீட்டில், நடந்த முறைகேடு குறித்து சி.பி.ஐ.
விசாரணை நடத்தி வருகிறது. இந்த முறைகேடு குறித்து முன்னாள் தொலை தொடர்பு
துறை மந்திரி ஆ.ராசா மற்றும் சில தொலை தொடர்பு துறை அதிகாரிகள் கைது
செய்யப்பட்டுள்ளனர்.

ஸ்பெக்ட்ரம் ஒதுக்கீடு
விவகாரத்தில் முன்னாள் தொலை தொடர்பு துறை மந்திரி தயாநிதி மாறன் மீதும்
குற்றச்சாட்டு எழுந்துள்ளது. தயாநிதிமாறன் நிர்ப்பந்தம் காரணமாக ஏர்செல்
நிறுவனத்தை தொழில் அதிபர் சிவசங்கரன் மலே சியாவின் மேக்சிஸ் நிறுவனத்துக்கு
விற்றதாக புகார் கூறப்பட்டது. மேலும் ஏர்செல் நிறுவன விண்ணப்பங்கள் சரியான
காரணமின்றி நிராகரிக்கப்பட்டு உள்ளதாக ஓய்வு பெற்ற நீதிபதி சிவராஜ்
பாட்டீல் தலைமையிலான விசாரணை கமிஷனும் தனது அறிக்கையில் குற்றம்சாட்டி
இருந்தது.

இதுபற்றி விசாரணை மேற்கொள்ள சி.பி.ஐ.
முடிவு செய்துள்ளது. தயாநிதிமாறன் தொலை தொடர்பு துறை மந்திரியாக பதவி
வகித்த 2004-ம் ஆண்டு மே 26-ந்தேதி முதல் 2007-ம் ஆண்டு மே 13-ந்தேதி
வரையிலான காலத்தில் அத்துறையின் முக்கிய பதவியில் இருந்து ஓய்வு பெற்ற
அதிகாரிகள் மற்றும் தற்போது பதவியில் இருக்கும் அதிகாரிகளிடம் விசாரணை
நடத்த சி.பி.ஐ. திட்டமிட்டுள்ளது. தயாநிதிமாறன் பதவியில் இருந்த காலத்தில்
ஏர்செல் நிறுவனத்தை விற்க ஏற்படுத்தப்பட்ட நிர்ப்பந்தம் குறித்தும்
மேக்சிஸ் நிறுவனத்துக்கு காட்டப்பட்ட சலுகைகள் குறித்தும் விசாரிக்கப்பட
இருப்பதாக சி.பி.ஐ. அதிகாரிகள் கூறினார்கள்.

இந்த
விவகாரத்தில் விதிமுறைகளுக்கு மாறாக தொலை தொடர்பு துறை செயல்பட்டது ஏன்?
என்பது குறித்து கேட்கப்பட உள்ளது. முன்னாள் தொலை தொடர்பு செயலாளர்
நிருபேந்திரா மிஸ்ரா, ஜே.எஸ்.சர்மா ஆகியோர் சி.பி.ஐ. விசாரணை வளையத்தில்
சிக்கும் முக்கிய அதிகாரிகளாகும். இதில் ஜே.எஸ்.சர்மா தற்போது டிராய் (தொலை
தொடர்பு ஒழுங்குமுறை ஆணையம்) தலைவராக உள்ளார்.

மேலும்
வயர்லெஸ் பிரிவில் இணை ஆலோசகர், ராம்ஜீசிங் குஷ்வாஹா, முன்னாள் சீனியர்
துணை இயக்குனர் பி.கே.மிட்டல் உள்ளிட்ட 6-க்கும் மேற்பட்ட அதிகாரிகளிடம்
சி.பி.ஐ. விசாரணை நடத்த உள்ளது.

மாலை மலர்