தமிழில் கேள்வி கேட்க வேண்டும் என்ற சசிகலாவின் கோரிக்கை ஏற்கபடுமா

சொத்து குவிப்பு வழக்கு விசாரணையில், சசிகலாவிடம் தமிழில் கேள்வி கேட்க வேண்டும் என்ற அவருடைய கோரிக்கை ஏற்கபடுமா? என்பதை வரும் 13ம் தேதி முடிவு செய்வதாக பெங்களூர் தனி நீதிமன்ற நீதிபதி தெரிவித்தார். முதல்வர் ஜெயலலிதா மீதான சொத்து குவிப்பு வழக்கு பெங்களூர் தனி நீதிமன்றத்தில் நடந்து வருகிறது.
வழக்கில் முதல் குற்றவாளியாக சேர்க்கப்பட்டுள்ள ஜெயலலிதா, கடந்த அக்டோபர் 20, 21 மற்றும் நவம்பர் 21, 22ம் தேதிகளில் நேரில் ஆஜராகி, நீதிபதி கேட்ட 1,339 கேள்விகளுக்கு பதில் அளித்தார்.

கடந்த மாதம் 29ம் தேதி இந்த வழக்கு விசாரணைக்கு வந்தபோது, வழக்கில் 2வது குற்றவாளியாக சேர்க்கப்பட்டுள்ள சசிகலாவுக்கு ஆங்கிலம் தெரியாது என்பதால், கேள்விகளை தமிழில் தயாரித்து கொடுக்க வேண்டும் என்று கோரப்பட்டது. அதை நிராகரித்த நீதிபதி, மொழி பெயர்ப்பாளர் மூலம் கேள்வி கேட்டு பதிவு செய்யப்படும் என்று கூறி விசாரணையை டிசம்பர் 8ம் தேதிக்கு ஒத்திவைத்தார்.

அதன்படி, இந்த வழக்கு நீதிபதி மல்லிகார்ஜுனையா முன்னிலையில் நேற்று விசாரணைக்கு வந்தது. ஜெயலலிதா நேரில் ஆஜராகாமல் இருக்க விலக்கு கேட்டு அவருடைய வக்கீல் பி.குமார் மனு கொடுத்தார். அதை நீதிபதி ஏற்றார். வழக்கில் 2, 3, 4வது குற்றவாளிகளாக சேர்க்கப்பட்டுள்ள சசிகலா, சுதாகரன், இளவரசி ஆகியோர் ஆஜராகினர். சசிகலாவின் வக்கீல் சந்தான கோபால் தாக்கல் செய்த சிறப்பு மனுவில், ‘சசிகலா 10ம் வகுப்பு வரை மட்டுமே படித்துள்ளதால் அவருக்கு போதிய ஆங்கில அறிவு கிடையாது.

வழக்கு ஆவணங்கள் பல ஆயிரம் பக்கங்கள் ஆங்கிலத்தில் உள்ளதால், அதை படித்து நீதிபதியின் கேள்விகளுக்கு பதிலளிக்கும் திறன் அவருக்கு இல்லை. ஆகவே, வழக்கு தொடர்பாக அவரிடம் கேட்கப்படும் கேள்விகளை முன்கூட்டியே தமிழ் மொழியில் தயாரித்து தர வேண்டும். மேலும், தனது கட்சிக்காரர் தமிழில் சொல்லும் பதிலை தமிழிலேயே பதிவு செய்ய வேண்டும்’ என்று கோரினார்.

இதற்கு எதிர்ப்பு தெரிவித்த அரசு வக்கீல் ஆச்சார்யா, ‘‘இந்த வழக்கை 15 ஆண்டுகளாக என்னென்ன காரணம் சொல்லி வழக்கை இழுத்தடிக்க முடியுமோ, அவ்வளவு இழுத்தடித்தனர். உச்ச நீதிமன்ற உத்தரவின் பேரில் ஜெயலலிதா நேரில் ஆஜராகி நீதிபதியின் கேள்விகளுக்கு பதிலளித்தார். இப்போது, 2வது குற்றவாளியிடம் கேள்வி கேட்க வேண்டிய நிலையில், ஆங்கிலம் தெரியாது, தமிழில் கேள்வி கேட்க வேண்டும் என்பது வழக்கை இழுத்தடிக்கும் முயற்சியாகும்.

2வது குற்றவாளிக்கு உதவ, இந்த இவ்வழக்கு ஆவணங்கள் தமிழில் இருந்து ஆங்கிலத்துக்கு மொழி மாற்றம் செய்த வக்கீல் ஹர்ஷாவை நீதிமன்றம் நியமித்துள்ளது. சசிகலாவின் பதிலை தமிழில் பதிவு செய்ய வேண்டும் என்பதை ஏற்க கூடாது. அவருடைய பதிலை ஆங்கிலத்தில் பதிவு செய்ய வேண்டும்’’ என்றார். இருதரப்பு வாதங்களை கேட்ட நீதிபதி மல்லிகார்ஜுனையா, ‘‘தமிழில் பதில் சொல்வதுடன், அதை தமிழில் பதிவு செய்ய வேண்டும் என்ற சசிகலாவின் கோரிக்கை மீது 13ம் தேதி தீர்ப்பு கூறுகிறேன்’’ என கூறி, விசாரணையை ஒத்திவைத்தார்.