கவிதை

by **கவினா** Sun 22 Jan 2012 - 7:42

எங்கேயிருக்குது கவிதையென்கிறாய்.
உன் கேள்வியிலேயே
இரண்டு மூன்று கவிதைகளை
கண்டுபிடிக்க முடிகிறது என்னால்.

காலி வீடென நினைத்து
நீ குடி வந்தபோது
உனக்கு முன்னால்
பால்காய்ச்சாமலேயே
குடிவந்திருந்த குருவிகள்.

உட்காருவதற்கு ஏற்ற இடம்தேடி.
அங்கேயிங்கே சுற்றி
கடைசியில்
கொசுவர்த்தியின் மேலேயே
வந்து உட்காரும்
திமிர் பிடித்த கொசு.

சுத்திவந்து காதலித்த முட்கள்
பனிரெண்டில்
ஒன்றாய் சேரும்போது
அதை
கத்தி கத்தி
காட்டிகொத்துவிடும் கடிகாரம்.

போவதும்
வருவதுமாய் இருந்தாலும்
வீட்டை விட்டு
வெளியே போகாத கதவு.

உன் ஓட்டைக்குடிசைக்குள்
சில்லறை காசுகளாய்
விழுந்து கிடக்கும் சூரிய ஒளி.

இப்படி
உன் வீட்டுக்குள்ளேயே இருக்கிறது.
ஆயிரத்தெட்டு கவிதைகள்.