குளித்தலை அருகே மணல் குவாரி தொழிலாளி சரமாரி வெட்டிக் கொலை

குளித்தலை, ஜூன். 3-

கரூர் மாவட்டம் குளித்தலை அருகே உள்ள நடுவதியம் காலனி பகுதியை சேர்ந்தவர் கருணாமூர்த்தி (வயது 32). இவர் அங்குள்ள மணல் குவாரியில் தொழிலாளியாக வேலை பார்த்து வந்தார். இவரது மனைவி தமிழ்செல்வி. இந்த தம்பதிக்கு கிஷோர், கீர்த்தி ஆகிய 2 குழந்தைகள் உள்ளனர்.

கருணாமூர்த்தி தினமும் மொபட்டில் வேலைக்கு சென்றுவிட்டு இரவு வீடு திரும்புவது வழக்கம். நேற்றும் அதேபோல் காலையில் வேலைக்கு சென்றார். இரவு வெகு நேரமாகியும் கருணாமூர்த்தி வீட்டுக்கு திரும்பவில்லை. இதனால் பதட்டம் அடைந்த உறவினர்கள் அவரை தேட தொடங்கினர்.

அப்போது வதியம் ரெயில்வே கேட் அருகே உள்ள ஒரு தென்னந்தோப்பில் கருணாமூர்த்தி படுகாயத்துடன் கிடப்பதாக தகவல் கிடைத்தது. உடனடியாக அங்கு சென்ற உறவினர்கள் படுகாயத்துடன் உயிருக்கு போராடிக்கொண்டிருந்த கருணாமூர்த்தியை பார்த்து அதிர்ச்சி அடைந்தனர்.

பின்னர் இதுபற்றி குளித்தலை போலீசாருக்கு தகவல் கொடுத்தனர். அதன்பேரில் இன்ஸ்பெக்டர் பாஸ்கரன் தலைமையில் போலீசார் விரைந்து வந்து கருணாமூர்த்தியை மீட்டு குளித்தலை அரசு ஆஸ்பத்திரிக்கு அனுப்பி வைத்தனர். அவரை பரிசோதித்த டாக்டர்கள் ஏற்கனவே அவர் இறந்து விட்டதாக தெரிவித்தனர்.

கருணாமூர்த்தியின் நெற்றி மற்றும் தலை பகுதியில் வெட்டு காயங்கள் இருந்தன. எனவே அவர் கொலை செய்யப்பட்டுள்ளார் என போலீசார் உறுதி செய்தனர். இதுதொடர்பாக கருணாமூர்த்தியின் மைத்துனர் ஸ்ரீதர் போலீசில் புகார் செய்தார். அதில் தனது மாமா வெட்டிக்கொலை செய்யப்பட்டுள்ளதாகவும், கொலையாளிகளை உடனே கைது செய்யவேண்டும் என்று குறிப்பிட்டிருந்தார்.

கொலைக்கான காரணம் இதுவரை தெரியவில்லை. வழக்கமாக வேலை முடிந்துவந்த அவரை மர்ம கும்பல் வழிமறித்து இந்த செயலை செய்திருக்கலாம் என்ற கோணத்தில் போலீசார் முதற்கட்ட விசாரணையை தொடங்கியுள்ளனர். தொடர்ந்து விசாரணை நடத்தப்பட்டு வருகிறது. இந்த சம்பவம் குளித்தலை பகுதியில் பெரும் பரபரப்பை ஏற்படுத்தி உள்ளது.

என்னங்க இந்த பசங்க பொசுக்கு கொன்னு போடறாங்க


நிதானமா யோசிச்சு செயல் பட்டாலே இந்த மாதிரி தவறுகள் குறைய வாய்ப்பு இருக்கிறது