திண்டுக்கல்லில் வக்கீலை தந்தையுடன் கட்டிப்போட்டு நகை கொள்ளை

by *சம்ஸ் Thu 20 Jun 2013 - 7:35

திண்டுக்கல், ஜூன்.20-

திண்டுக்கல் நாகல்நகர் பாம்பன் ஆசாரிசந்து பகுதியை சேர்ந்தவர் அழகர்(80). இவர் ஓய்வு பெற்ற மின்வாரிய ஊழியர். இவரது மகன் கண்ணன்(52). வக்கீலாக உள்ள இவருக்கு இன்னும் திருமணம் ஆகவில்லை. இவர்கள் இருவர் மட்டுமே வசித்து வருகின்றனர்.

நேற்று இரவு 11.30 மணியளவில் அழகர் தன் வீட்டு முன்கேட்டை அடைக்க சென்றார். அப்போது திடீரென 4 பேர் கொண்ட முகமூடி கும்பல் அழகரை இரும்புக்கம்பியால் சரமாரியாக தாக்கினர். தந்தையின் அலறல் சத்தம் கேட்டு வீட்டில் இருந்து ஓடிவந்த கண்ணன் தந்தையை மர்மகும்பல் தாக்குவது கண்டு அதிர்ச்சி அடைந்தார்.

தந்தையை காப்பாற்ற முயன்றபோது அந்த மர்ம கும்பல் அவரையும் சரமாரியாக தாக்கினர். இருவருக்கும் தலை, கை கால்களில் பலத்த ரத்தகாயம் ஏற்பட்டது. இருவரையும் அந்த கும்பல் கயிறுகளால் கட்டிப் போட்டனர்.

பின்னர் முகமூடி கும்பல் அழகர் வீட்டிற்குள் நுழைந்து பீரோவில் இருந்த 16 பவுன் நகையை கொள்ளையடித்தனர். மேலும் ரொக்க பணம் உள்ளதா? என தேடிப்பார்த்தனர். பணம் ஏதும் இல்லாததால் ஆத்திரம் அடைந்த அந்த கும்பல் பீரோவில் இருந்த துணிமணிகள் மற்றும் பொருட்களை வீசி எறிந்துவிட்டு அங்கிருந்து தப்பி சென்றுவிட்டனர்.

முகமூடி கொள்ளையர்கள் தாக்கியதில் மயங்கிய நிலையில் கை கால்கள் கட்டப்பட்டிருந்த நிலையில் கிடந்த இருவரையும் அக்கம்பக்கத்தினர் இன்று காலை பார்த்து அதிர்ச்சி அடைந்தனர். உடனடியாக இந்த சம்பவம் குறித்து திண்டுக்கல் தெற்கு போலீசாருக்கு தகவல் கொடுக்கப்பட்டது.

போலீசார் விரைந்து வந்து உயிருக்கு போராடிக் கொண்டிருந்த தந்தை-மகனை மீட்டு 108 ஆம்புலன்ஸ் மூலம் திண்டுக்கல் அரசு ஆஸ்பத்திரிக்கு அனுப்பி வைத்தனர். பின்னர் மேல் சிகிச்சைக்காக இருவரும் மதுரை அரசு ஆஸ்பத்திரியில் சேர்க்கப்பட்டனர். அங்கு அவர்களுக்கு தீவர சிகிச்சை அளிக்கப்பட்டு வருகிறது.

போலீசார் நடத்திய விசாரணையில் நள்ளிரவில் முகமூடி கும்பல் தந்தை-மகனை தாக்கி நகையை கொள்ளையடித்து சென்றது தெரியவந்தது. இன்று காலை மாவட்ட போலீஸ் சூப்பிரண்டு ஜெயச்சந்திரன் கொள்ளை நடந்த இடத்தை பார்வையிட்டு விசாரணை நடத்தினார். மேலும் மோப்பநாய், கைரேகை நிபுணர்கள் வரவழைக்கப்பட்டும் விசாரணை நடத்தப்பட்டது.

மக்கள் நடமாட்டம் மிகுந்த பகுதியில் முகமூடி கொள்ளையர்கள் தங்கள் கைவரிசையை காட்டி யிருப்பது திண்டுக் கல்லில் பெரும் பரபரப்பை ஏற்படுத்தியுள்ளது. மேலும் போலீசார் அழகர் வீட்டின் அருகே வசிப்பவர்களிடம் கொள்ளையர்கள் குறித்து தீவிர விசாரணை நடத்தி வருகின்றனர்.

சமீப காலமாக திண்டுக்கல் நகரில் பூட்டி கிடக்கும் வீடுகள், தனியாக வசிக்கும் முதியோர் வீடுகளை குறிவைத்து கொள்ளையர்கள் தங்கள் கைவரிசையை காட்டி வருகின்றனர்.

மேலும் தனியாக செல்லும் பெண்கள், கணவனுடன் செல்லும் பெண்களிடம் நகை பறிப்பு சம்பவங்களும் அதிகரித்து வருகிறது. எனவே இந்த விசயத்தில் மாவட்ட போலீஸ் சூப்பிரண்டு அதிரடி நடவடிக்கை எடுத்து கொள்ளை கும்பலை பிடிக்க உடனடியாக நடவடிக்கை எடுக்கவேண்டும் என திண்டுக்கல் நகர பொதுமக்கள் வலியுறுத்தியுள்ளனர்.

தற்போது வக்கீல் வீட்டில் நடந்துள்ள கொள்ளை சம்பவத்தில் முகமூடி அணிந்த கொள்ளையர்கள் கைவரிசை காட்டியிருப்பது போலீசாருக்கு பெரும் சவாலை ஏற்படுத்தியுள்ளது. கொள்ளையில் ஈடுபட்டது உள்ளூர்காரர்களா? அல்லது வெளிமாவட்ட கொள்ளையர்களா? என தீவிர விசாரணை நடத்தப்பட்டு வருகிறது.