மேலுமொரு தொகுதி மருத்துவர் குழு இன்றும் நேபாளம் பயணம்

by **நண்பன்** Mon 27 Apr 2015 - 7:42

மேலுமொரு தொகுதி மருத்துவர் குழு இன்றும் நேபாளம் பயணம்

பூகம்பத்தில் சிக்கி நிர்க்கதிக்குள் ளாகியிருக்கும் மக்களுக்கு சிகிச்சை யளிப்பதற்கு தேவையான மேலுமொரு தொகுதி மருத்துவக் குழு இன்றும் இலங்கை விமானப் படைக்குச் சொந்தமான விமானத்தில் நேபாளம் நோக்கிச் செல்லவுள்ளன.
ஜனாதிபதி மைத்திரிபால சிறிசேனவின் பணிப்புரைக்கமையவே முப்படையினர் பொலிஸ் மற்றும் சுகாதார அமைச்சு ஆகியன இதற்கான ஏற்பாடுகளை முன்னெடுத்துள்ளது.
குறித்த விமானத்தில் 4 ஆயிரம் கிலோ கிராம் நிறையுடைய மருந்து, உணவுப் பொருட்கள் மற்றும் குடிநீர் போத்தல்கள் இன்று நேபாளத்திற்கு கொண்டு செல்லப்படவுள்ளன.
இந்த விமானத்தில் ஒரு இராணுவ அதிகாரி தலைமையில் 15 இராணுவ வீரர்களும் ஒரு கடற்படை அதிகாரியின் தலைமையில் 13 கடற்படை வீரர்களும் ஒரு விமானப் படை அதிகாரியின் தலைமையில் 10 விமானப் படை வீரர்க ளுமாக முப்படையைச் சேர்ந்த 41 பேர் இன்று நேபாளம் செல்கின்றனர்.
நேபாளத்தின் தற்போதைய நிலைமை தொடர்பில் ஆராயும் அவசர கூட்டம் நேற்றும் (26) ஜனாதிபதி செயலகத்தில் ஜனாதிபதிச் செயலாளர் பீ. டி அபயகோன் தலைமையில் கூட்டப்பட்டது.
இடர் முகாமைத்துவ அமைச்சர் ஏ. எச். எம். பெளசி, பிரதமரின் செயலாளர் சமன் ஏக்கநாயக்க, பாதுகாப்பு அமைச்சின் செயலாளர் டி. எம். யூ. டி. பஸ்நாயக்க, வெளிவிவகார அமைச்சின் செயலாளர் சித்ராங்கணி வாகீஷ்வர, இடர் முகாமைத்துவ அமைச்சின் செயலாளர் எம். பந்துசேன உள்ளிட்ட பல முக்கிய அமைச்சின் அதிகாரிகள் கலந்துகொண்டனர்.
இக்கூட்டத்தின்போது அனர்த்த முகாமைத்துவ அமைச்சின் கீழ் 24 மணித்தியாலமும் தொடர்புகொள்ளக் கூடிய அவசர அழைப்பு இலக்கமொன்றினை நிறுவுவது தொடர்பிலும் தீர்மானம் எடுக்கப்பட்டது. நேபாள மக்களுக்கு தேவையான உணவுப் பொருட்களை தொடர்ந்தும் விமானங்கள் மூலம் எடுத்துச் செல்வதற்கான ஏற்பாடுகள் மேற்கொள்ளப்பட்டு வருகின்றன.