எதுவுமே புரியவில்லை....-கவிதை

by **rammalar** Tue Jul 23, 2019 9:09 pm

நீங்கள் எதைச் சொல்லித்
தந்தீர்கள்
எதைச் செய்யச் சொன்னீர்கள்
எதைச் சாதிக்க கற்பித்தீர்கள்?

எங்கள் இதயங்களில்
எல்லாம் எதிர் மறையாகி
இயற்கையை நாசமாக்கி
கொண்டிருக்கிறோம்!

சொல்லித் தந்தது
முறையாக இல்லையா
இல்லை... இல்லை...
புரிந்து கொண்டவை
தான் தப்பாகிப் போனதா?

ஆறு, குளம்
ஆழப்படுத்தச் சொன்னபோது
அந்த அழகையே
மணலாக
கொள்ளையிட்டோம்!

நீங்கள் பாதுகாக்கச் சொன்ன
எல்லா நீர் நிலைகளையும்
நாங்கள் மேடுகளாக்கி
மின்னொளி வீசும் நகரங்களாக்கி
அழகுபடுத்திக் கொண்டிருக்கிறோம்!

எத்தனையோ முறை
அடுத்த மாநில
சகோதரனும், சகோதரியும்
இயற்கையின் சீற்றங்களுக்கும்
மழை வெள்ளத்தின்
பயங்கரத்திற்கும் ஆளாகி
பேரிடர் இழப்பில் திரும்பி எழ
ஆண்டுகள் போவது
தெரிந்திருந்தும்...

நாங்கள்
இயற்கை வளங்களை
கொள்ளையடித்து,
'பேரிடர்' வரும்
வேளையில்,
வாயிலும், வயிற்றிலும்
அடித்துக் கொள்வோம்!

காடுகளை அழித்து
நாடாக்கி
இப்போது, கையேந்தி
நிற்கிறோம்
இயற்கை அன்னையின்
முன்னால்!

விதைக்கச் சொன்னீர்கள்
விருட்சங்களை வளர்க்க
சொன்னீர்கள்...
விளை நிலங்களில்
நீங்கள் சொன்னவற்றை
மறந்து - கான்கிரீட்
வீடுகள் வளர்க்கிறோம்!

ஆம்...
குளங்களை பாதுகாக்கச்
சொன்னீர்கள்...
அதனுள்ளே பல மாடிகள்
உருவாக்கி, சாலைகளும்,
மின் விளக்குகளுமிட்டு
மிக பொறுப்பாக
கவனிக்கிறோம்!

என் மூதாதையர்களே...
நாங்கள், அடுத்த
தலைமுறைக்கு, எதையேனும்
விட்டுச் செல்வோமா
புரியவில்லை!
-
------------------------------------

- ரஜகை நிலவன், மும்பை.
வாரமலர்