லிபியா மீதான இராணுவ நடவடிக்கைக்கு கொங்கிரஸ் அனுமதி தேவையில்லை

லிபியா மீதான இராணுவ நடவடிக்கைக்கு கொங்கிரஸ் அனுமதி தேவையில்லை
வெள்ளை மாளிகை விளக்கம்
லிபியா மீதான இராணுவ நடவடிக்கையை முன்னெடுப்பதற்கு ஜனாதிபதி பராக் ஒபாமா அமெரிக்க கொங்கிரஸ் சபையிடம் அனுமதி பெறவேண்டிய தேவை இல்லை என வெள்ளை மாளிகை அறிவித்துள்ளது.

கொங்கிரஸ் சபைக்கு விளக்கம் அளிக்கும் முகமாக வெள்ளை மாளிகை வெளியிட்டுள்ள 32 பக்க அறிக்கையிலேயே இவ்வாறு தெரிவிக்கப்பட்டுள்ளது. அத்துடன் ஜனாதிபதி ஒபாமா லிபியா மீது இராணுவ நடவடிக்கை முன்னெடுத்தது சட்ட விதிகளுக்கு அமைவாகவே எனவும் அந்த அறிக்கையில் கூறப்பட்டுள்ளது.

அமெரிக்காவின் 1973ம் ஆம் ஆண்டு யுத்தம் தொடர்பான சட்ட விதியின்படி அமெரிக்க இராணுவத்தை பயன்படுத்துவது குறித்து 60 நாட்களுக்குள் அந்நாட்டு கொங்கிரஸ் சபையில் அனுமதி பெறவேண்டும். இதனடிப்படையில் வெள்ளை மாளிகை லிபியாவில் அமெரிக்க இராணுவத்தை பயன்படுத்தியது குறித்து கொங்கிரஸ் சபைக்கு விளக்கமளிக்க வேண்டும் என சபாநாயகர் ஜோன் பொஹ்னர் உத்தரவிட்டிருந்தார். இன்றைய தினத்திற்குள் விளக்கம் அளிக்கப்பட வேண்டும் எனவும் கொங்கிரஸ் சபை கெடு விதித்திருந்தது.

லிபியா மீது அமெரிக்கா இராணுவ நடவடிக்கை முன்னெடுத்து வரும் ஞாயிற்றுக்கிழமையுடன் 90 நாட்கள் பூர்த்தியாகிறது. இதனால் இந்த நடவடிக்கை முன்னெடுக்கப்பட்டு 60 நாட்கள் பூர்த்தியான கடந்த மே 20 ஆம் திகதி முதல் ஜனாதிபதி பராக் ஒபாமா அமெரிக்க சட்டத்தை மீறி செயற்படுவதாக கொங்கிரஸ் சபை குற்றம்சாட்டி இருந்தது.

இந்திலையிலேயே வெள்ளை மாளிகை லிபிய இராணுவ நடவடிக்கை குறித்து 32 பக்க விளக்க அறிக்கையை சமர்ப்பித்துள்ளது.

இதில் லிபியா மீதான இராணுவ நடவடிக்கையில் அமெரிக்கா நேட்டோவுக்கு உதவியாகவே செயற்படுகிறது என்றும் அது நேரடியாக செயற்படவில்லை எனவும் குறிப்பிடப்பட்டுள்ளது. எனவே, இது 1973 அமெரிக்க யுத்தம் தொடர்பான விதியை மீறும் செயல் அல்ல எனவும் அந்த அறிக்கையில் கூறப்பட்டுள்ளது.

இதேவேளை, லிபியாவில் இடம்பெறும் மனிதாபிமான நடவடிக்கைகளுக்காக கடந்த ஜூன் 3 ஆம் திகதி வரை 800 மில்லியன் டொலர்கள் செலவாகியுள்ளதாகவும் எதிர்வரும் செப்டெம்பர் 30 ஆம் திகதி வரை நீடிக்கப்பட்டுள்ள இந்த மனிதாபிமான நடவடிக்கைகளுக்கு மொத்த செலவீனமாக 1.1 பில்லியன் டொலர் வரை செல்லும் என கணக்கெடுக்கப்பட்டுள்ளதாகவும் வெள்ளைமாளிகை அறிக்கையில் குறிப்பிடப்பட்டுள்ளது.