2012 இல் 33,000 அமெரிக்கப் படை ஆப்கானிலிருந்து வாபஸ்

10,000 துருப்புகள் இந்த ஆண்டில் வெளியேறவுள்ளதாக ஒபாமா அறிவிப்பு
2012 ஆம் ஆண்டுக்குள் ஆப்கானிஸ்தானில் இருந்து 33,000 அமெரிக்க துருப்புகள் வாபஸ் பெறப்படும் என அமெரிக்க ஜனாதிபதி பராக் ஒபாமா அறிவித்தார். இதன்படி 10,000 அமெரிக்க துருப்புகள் இந்த ஆண்டு இறுதியில் ஆப்கானில் இருந்து வெளியேறவுள்ளதோடு 2012 ஆம் ஆண்டு கோடை காலத்திற்கு முன்பு மேலும் 23,000 துருப்புகள் ஆப்கானில் இருந்து வாபஸ் பெறப்படும் என ஒபாமா குறிப்பிட்டார்.

ஆப்கானிஸ்தானில் இருக்கும் வெளிநாட்டு படைகள் வரும் 2014 ஆம் ஆண்டு முழுமையாக வெளியேறவுள்ளது. இதில் அங்கு இருக்கும் சுமார் ஒரு இலட்சம் அமெரிக்கப் படைகளை வாபஸ் பெறுவது குறித்த விசேட அறிவிப்பை அமெரிக்க ஜனாதிபதி பராக் ஒபாமா நேற்று முன்தினம் வெளியிட்டார். வெள்ளை மாளிகையில் இது குறித்து அவர் ஊடகங்களிடம் தெரிவித்தார்.

இதன்போது ‘யுத்தத்தில் எமது பங்களிப்பை முடித்துக் கொள்கிறோம். இது ஆரம்பம்தான். ஆனால் முடிவு அல்ல’ என ஒபாமா குறிப்பிட்டார்.

ஆப்கானிஸ்தானில் சுமார் ஒரு இலட்சம் அமெரிக்கத் துருப்புகள் நிலைகொண்டுள்ளன. இதற்காக அமெரிக்க அரசு வாரம் ஒன்றுக்கு 2 பில்லியன் டொலர்களை செலவு செய்கிறது. இது குறித்து அமெரிக்க கொங்கிரஸ் மற்றும் அந்நாட்டு மக்கள் தொடர்ந்து அதிருப்தி வெளியிட்டு வருகின்றனர்.

ஆப்கானில் இதுவரை 1500 துருப்புகள் கொல்லப்பட்டுள்ளதோடு 12000 வீரர்கள் அளவில் காயமடைந்துள்ளனர்.

இந்த நெருக்கடிக்கு மத்தியிலேயே அமெரிக்க ஜனாதிபதி துருப்புகளை வாபஸ்பெறுவது பற்றிய அறிவிப்பை வெளியிட்டுள்ளார்.

இதில் முதலாம் கட்ட வெளியேற்றம் இரண்டு படிமுறைகளில் இடம்பெறவுள்ளது. முதல் கட்டமாக 5000 துருப்புகள் இந்த பருவ காலத்தில் அமெரிக்கா திரும்பவுள்ளது. தொடர்ந்து இந்த ஆண்டு இறுதியில் மேலும் 5000 துருப்புகள் நாடு திரும்பவுள்ளதாக ஒபாமா குறிப்பிட்டுள்ளார்.

இதனையடுத்து 20,000 துருப்புகள் மற்றும் 3000 உதவி துருப்புகள் 2012 ஆம் ஆண்டு செப்டெம்பர் மாத இறுதியில் ஆப்கானில் இருந்து வாபஸ் பெறப்படவுள்ளது. எனினும் 2014 ஆம் ஆண்டு வரை எஞ்சிய 68000 அமெரிக்க துருப்புகள் ஆப்கானிஸ்தானில் நிலைகொண்டிருக்கும் என அமெரிக்க ஜனாதிபதி ஒபாமா குறிப்பிட்டுள்ளார்.

எனினும் ஒபாமாவின் இந்த அறிவிப்பானது அமெரிக்க நிர்வாகம் எதிர்பார்த்ததை விடவும் மிக வேகமான படைகளின் வெளியேற்றம் என விமர்சகர்கள் தெரிவித்துள்ளனர்.

இதன் போது அமெரிக்க ஜனாதிபதி பராக் ஒபாமா மேலும் கூறியதாவது :

நாம் தலிபான்களிடம் இருந்து பல பாடங்களை கற்றுக்கொண்டோம். அதேபோன்று அவர்களது வலுவான தளங்களை ஆக்கிரமித்தோம். எமது கூட்டுப் படையினரும் அங்கு தமது பங்களிப்பை செய்தனர். இதனால் நாட்டின் உறுதித் தன்மையை அதிகரிக்க முடிந்தது.

ஆப்கானிஸ்தான் துருப்புகள் ஒரு இலட்சத்தை விடவும் அதிகரித்துள்ளது. சில மாகாணங்கள் ஆப்கான் துருப்புகளின் முழு கட்டுப்பாட்டில் உள்ளன. ஆப்கான் பாதுகாப்பு சேவைகளை அந்நாட்டு துருப்புகளிடம் கையளிக்கும் திட்டம் தற்போது ஆரம்பிக்கப்பட்டுள்ளது என்று பராக் ஒபாமா குறிப்பிட்டார்.