15 வயதுக்கு குறைந்த சிறுவர்களை பணிக்கு அமர்த்துவோருக்கு எதிராக நடவடிக்கை

by **நண்பன்** Sat 25 Jun 2011 - 14:00

15 வயதுக்கு குறைந்த சிறுவர்களை பணிக்கு அமர்த்துவோருக்கு எதிராக நடவடிக்கை
நிரூஸி விமலவீர
பதினைந்து வயதுக்குக் குறைந்த சிறுவர் சிறுமியரை பாடசாலைகளுக்கு அனுப்பாமல் இருத்தல், வீட்டுப் பணியாளர்களாக வேலை வாங்குதல் மற்றும் பிச்சையெடுக்கச் செய்து பணம் சம்பாதித்தல் ஆகிய மூன்று செயற்பாடுகளில் ஈடுபடுத்தும் பெரியவர்களுக்கு எதிராக பொலிஸார் உடனடி சட்டநடவடிக்கை எடுக்கவுள்ளனர்.

பாடசாலைகளுக்கு பிள்ளைகளை அனுப்பாமல் வீட்டில் வைத்திருக்கும் பெற்றோர் நீதிமன்றத்தில் ஆஜர்படுத்தப்பட்டு ஏன் தங்கள் பிள்ளைகளை பாடசாலைக்கு அனுப்பவில்லையென்று நீதிமன்றத்தில் விளக்கம் கோரப்படும். இதற்கு நியாய பூர்வமான விளக்கத்தையளித்து வறுமை காரணமாக பிள்ளைகளை அனுப்பவில்லை யென்று அவர்கள் கூறினால் அவர்களின் பிள்ளைகளின் கல்விக்காக ஓரளவு நிதியுதவி பெற்றுக்கொடுக்கப்படும் என சிறுவர் மற்றும் மகளிர் விவகார அமைப்பின் தலைவி திருமதி அனோமா திஸாநாயக்க தெரிவித்தார்.

வீடுகள் மற்றும் கடைகள், விற்பனை நிலையங்களில் 15 வயதுக்குக் குறைந்த பிள்ளைகளை வேலைக்கு அமர்த்துவது தண்டனைக்குரிய குற்றம் எனக் குறிப்பிட்ட அவர், சம்பந்தப்பட்டவர்களுக்கு எதிராக சட்ட நடவடிக்கை எடுத்த பின்னர் பிள்ளைகளுக்கு தங்குமிடவசதி இல்லாதிருந்தால் அவர்களை சிறுவர் பராமரிப்பு நிலையங்களில் சேர்த்து கல்வியைத் தொடர்வதற்கு தமது அமைப்பு உதவிசெய்யுமென்றும் கூறினார்.

அதேவேளை, பிள்ளைகளை பிச்சையெடுக்கவைக்கும் தாய்மார் அல்லது பெற்றோரை நீதிமன்றத்தில் தண்டிக்கவைத்த பின்னர் அந்தப் பிள்ளைகள் சிறுவர் பராமரிப்பு நிலையங்களுக்கு அனுப்பிவைக்கப்படுவார்கள். சிறுவர்கள் சட்டவிரோதமாக வேலைக்கமர்த்தப்படுவது பற்றிய உண்மையான தகவல்கள் தெரிந்தவர்கள் 1929 விசேட தொலைபேசி இலக்கத்துடன் தொடர்புகொண்டு அறிவித்தால் சம்பந்தப்பட்டவர்களுக்கு எதிராக சட்டநடவடிக்கை எடுக்கப்படும் என்றும் அவர் தெரிவித்தார்.

சிறுவர்களுக்கு சிறுபராயத்தை சுதந்திரமாக அனுபவிக்கும் உரிமை இருக்கிறது என்றும், அந்த உரிமையை பெற்றோர் மட்டுமன்றி எவரும் பறிக்க முடியாதென்றும் அவர் மேலும் குறிப்பிட்டார்.