குரான் ஷரீஃப் - உடைய முதல் வார்த்தையே "இக்ரா" என்பதாகவே உள்ளது

மனித குலத்துக்கு அருளப்பட்ட
குரான் ஷரீஃப் - உடைய முதல் வார்த்தையே "இக்ரா" (ஓதுங்கள் - படியுங்கள் - Recite or Read)

என்பதாகவே உள்ளது.

'கற்றாருக்கு சென்ற இடமெல்லாம் சிறப்பு' -
'கல்வியே செல்வத்துட்
செல்வம்' -
என்பதெல்லாம் தமிழர்களின் நம்பிக்கைகளில் வருவதாகும்.

கல்வியை கற்க சொல்வதில் இஸ்லாம் ஆண் பெண் என்கிற பேதம் பார்ப்பதில்லை. கல்வி கற்பது இருபாலருக்கும் கடமையாகவே
விதிக்கப்பட்டிருக்கிறது.

"கல்வி சீனாவில் தான் கிடைக்கும் என்றால் அங்கு சென்று கல்வியை கற்றுக்
கொள்ளுங்கள்" என்று ஒரு ஹதீஸ் இருக்கிறது.

எங்கள் ஊர் ஹஜ்ரத் சொன்னார்கள்: 'சீன்' ங்குற வார்த்தைய தான் 'சீனா'
ன்னு சொல்லி இருக்கிறாஹ. 'சீன்' ங்குற வார்த்தைக்கு- சிங்கத்திட நெத்தி -
ன்னு இன்னொரு
அர்த்தம் இருக்கு; அப்பிடி போட்டு பாருங்க.. இன்னும் பொருத்தமா
இருக்கும்..' என்று.

அதாவது, 'கல்வியை கற்றுக் கொள்ளுங்கள் - அது சிங்கத்தின் நெற்றியில்
இருந்தாலும் சரி'. (இந்த அர்த்தத்தில் பார்த்தால்
சீனா காரர்களுக்கும் இந்த ஹதீஸ் பொருந்தும் தானே!)

குரான் ஷரீஃபில் 'இல்ம்' (அறிவு) என்ற வார்த்தை மட்டும் 750 இடங்களில்
வருகிறதாம்.

இந்த கல்வி, மார்க்க (இஸ்லாமிய) கல்வியை மட்டுமே தான் குறிக்கும் என்று வாதிடுபவர்களும்
உண்டு. உண்மை அதுவல்ல - என்று இஸ்லாமிய வரலாறு சொல்கிறது!

ஆம்! முஸ்லீம்கள் மீது (இஸ்லாத்துக்கு எதிரான) காஃபிர்கள்
(எனும் இஸ்லாத்தை ஏற்காதவர்கள்) போர் தொடுக்கிறார்கள். முஸ்லீம்கள் மீது
நிர்பந்திக்கப்பட்ட அந்த போரில் முஸ்லீம்களிடம் தோற்று, கைதிகளாகி- அநாதரவான நிலையில்- நிற்கிறார்கள்
காஃபிர்கள்.

இந்த கட்டத்தில் - இந்த நவீன காலத்தில், நம் அறிவுக்குதெரிந்து ஈழப்
போரில் சிறைப்பிடிக்கப்பட்ட நமது தமிழ் உறவுகள் மீது ஏவப்பட்ட
அடக்குமுறைகளை கண்கூடாக
பார்த்தும் நமது கைகளையும் கால்களையும் வெறுமனே வைத்துக்கொண்டு ஒன்றும்
செய்ய முடியாத நிலை தான் நமக்கு ஏற்பட்டது.

ஆனால், போரில் வெற்றிப்பெற்ற, பெருமானார் நபிகள் நாயகம் (ஸல்) அவர்கள் அறிவிக்கிறார்கள்: 'முஸ்லீம்களுக்கு கல்வி
கற்றுக் கொடுத்தால் காஃபிர்களுக்கு விடுதலை' என்று.

இங்கே கவனிக்க வேண்டியது ..... கைதிகளாக நிற்பவர்கள் தங்களை கொல்ல வந்தவர்கள்;
சற்று முன்னர் தங்களோடு போர்களத்தில் வாளோடு வாள் வைத்து மோதிக்
கொண்டவர்கள்.

வழக்கமாக, சண்டையில் வெற்றி பெற்றவர்கள் தாம் , 'நான் அவனுக்கு (தோல்வி
அடைந்தவருக்கு) சரியான அல்லது தக்கப்பாடம் கற்றுக் கொடுத்தேன்' என்று
பெருமையாகவும் கர்வத்தோடும் பேசுவார்கள். ஆனால், அன்று .... 'பத்ரு' போரில் தோல்வி
அடைந்தவர்கள் அதே போரில் வெற்றி பெற்றவர்களுக்கு பாடம் சொல்லி
கொடுத்தார்கள்.

முஸ்லீம்கள், தாம் பெற்ற வெற்றியை PARTY வைத்து கொண்டாடவில்லை. மாறாக,
தங்களிடம் தோல்வி அடைந்தவர்களிடமே மாணவர்களாக பாடம் கற்றுக்
கொண்டிருந்தார்கள். உண்மையில், இந்த வரலாறே மிகச் சிறந்த பாடமாக அமைகின்றது.

'படிக்க வரக்கூடாது; உங்களுக்கு கல்வி கிடையாது' - என்று கல்வி மறுக்கப்பட்ட
மிகவும் கொடூரமான சூழலில் வாழ்ந்தவர்களால் இதனை சிறந்த பாடமாக புரிந்து
கொள்ள முடியும்.

தவிர, இஸ்லாத்தை ஏற்காத காஃபிர்கள் - முஸ்லீம்களுக்கு இஸ்லாமிய
ஷரீஅத்தையா சொல்லி கொடுத்திருப்பார்கள்? உலக கல்வியை தானே கற்றுக்
கொடுத்திருப்பார்கள்.

பள்ளிவாசலானது, அன்று முதல் - முஸ்லீம்கள் தொழுத நேரம் போக மற்றைய நேரங்களில் பகுதிநிலை
பள்ளிகூடமாகவும் மாறித்தான் போனது. அதாவது 'ஜாமிஆ' வாகவும் மாறியது. 'ஜாமியா' என்ற
வார்த்தையே பள்ளிகூடத்தையும் தொழுகின்ற இடத்தையும் இணைக்கின்ற வார்த்தை தானே!

வேறு வார்த்தையில் சொல்வதானால், பள்ளிவாசல் பகுதி நேர
வகுப்புகள் (PART TIME CLASS) நடக்கும் இடமாக மாறியது. அந்த வகையில்
பார்த்தால் முதன் முதலில் உலகத்துக்கு PART TIME கல்வி முறையை
அறிமுகம் செய்தது முஹம்மது நபிகள் நாயகம் (ஸல்) அவர்கள் என்றே நாம் அறுதியிட்டு சொல்லலாம்.