பிரபாகரன் ஆயுதத்தால் அடைய நினைத்ததை வேறு சிலர் சூட்சுமமாகத் தட்டிக் கொள்ள முயற்சி: தேசப்பற்றுள்ள தேசிய இயக்கம்

by **நண்பன்** Thu 23 Dec 2010 - 19:00

தேசியத் தலைவர் பிரபாகரன் ஆயுதத்தால் பெற முயற்சித்ததை தற்போது மிக சூட்சுமமான முறையில் வேறு சிலர் பெற முயற்சிக்கின்றனர் என்று தேசப்பற்றுள்ள தேசிய இயக்கத்தின் தலைவர் குணதாச அமரசேகர நேற்று குற்றஞ்சுமத்தினார்.

கொழும்பில் நேற்று நடைபெற்ற ஊடகவியலாளர் சந்திப்பில் கலந்துகொண்டு உரையாற்றியபோதே அவர் மேற்படி குற்றச்சாட்டை முன்வைத்தார்.
அவர் அங்கு மேலும் கூறியவை வருமாறு:
தென் மாகாணம், மேல் மாகாணம் ஆகிய பகுதிகளிலேயே பெரும் எண்ணிக்கையான மக்கள் வாழ்கின்றனர். சிங்கள மக்களுக்கு காணிகள் இல்லாமை காரணமாக யானைகளுக்கும், மக்களுக்கும் இடையே மோதல்கள் ஏற்படுகின்றன. இந்தளவுக்கு காணிப்பிரச்சினை சிங்கள மக்களுக்கு உள்ளது.
தமிழ், சிங்களம் உட்பட நாட்டில் வாழும் அனைவருக்கும் வடக்கு, கிழக்குக்குச் சென்று அங்கு வாழும் அடிப்படை உரிமை இருக்கவேண்டும். ஏனெனில், அங்கு பெருமளவு நிலப்பரப்பு காணப்படுகிறது.
நாட்டில் இடம்பெற்ற யுத்தத்தை முடிவுக்குக் கொண்டுவர கிராமப்புறங்களிலுள்ள இளைஞர்கள் அதிக சேவை செய்துள்ளனர். அவர்கள் இராணுவத்தில் இணைந்து நாட்டை மீட்கப் போராடினர். நாம் நன்றியுள்ளவர்கள் என்றால், அவர்களை அவர்களது குடும்ப அங்கத்தவர்களை இந்தப் பகுதிகளுக்குக் கொண்டு சென்று குடியமர்த்தவேண்டும்.
வடக்கு, கிழக்குப் பகுதிகளில் வெறுமையாகக் காணப்படும் பெரும் நிலப்பரப்பில் இவர்கள் குடியமர்த்தப்படவேண்டும். எதிர்காலத்தில் இனவாதிகள் ஈழமொன்றை அமைப்பதற்கு இடமளிக்காமல் இந்தப் பகுதிகளில் சிங்கள மக்களை குடியிருக்கச் செய்வது முக்கியமாகும். இது இனவாதமல்ல. நன்றிக்கடன் செலுத்துவதைப் போன்றதாகும்.
இந்த நாட்டை மீட்டது, யுத்தத்துக்கு எதிரானவர்களோ, அரசசார்பற்ற நிறுவனங்களோ அல்ல, இந்த இளைஞர்களே. ஆகவே, இந்த நாட்டில் எங்கு சென்றும் வாழ்வதற்கான முழு உரிமை அந்த இளைஞர்களுக்கு உண்டு. தெற்கிலுள்ள மக்களுக்கு வேறு இடங்கள் இல்லை. அத்துடன், இந்த இராணுவ இளைஞர்கள் வடக்கு, கிழக்குக்குச் சென்று வாழ்வதை இராணுவக் குடியிருப்புகள் எனவும் கூறமுடியாது என்றார்.