உலக சாம்பியன் பட்டம் பெறணும்: ஐஸ்வர்யா!

by **நேசமுடன் ஹாசிம்** Mon 25 Jul 2011 - 11:48

ஐஸ்வர்யா... டேபிள் டென்னிஸில் தமிழகத்தின் பெருமையை இந்திய அளவில் உயர்த்திக் கொண்டிருக்கும் கல்லூரி மாணவி. இருபது வயதுக்குள் இந்திய அளவிலும், மாநில அளவிலும் நூற்றுக்கணக்கான பதக்கங்களை வென்றிருக்கும் ஐஸ்வர்யா, சமீபத்தில் கர்நாடகா மாநிலத்தில், பெல்காமில் நடந்த தென்மண்டலப் போட்டியிலும் தங்கத்தை வென்றுள்ளார்.

சென்னையில் உள்ள எம்.ஓ.பி. வைஷ்ணவா மகளிர் கல்லூரி மாணவியான ஐஸ்வர்யா, அடுத்து சர்வதேச அளவில் சாதிக்க... கடும் முயற்சி எடுத்து வருகிறார். சென்னை, நேரு ஸ்டேடியத்தில் வியர்க்க விறுவிறுக்க பயிற்சி ஆட்டத்தில் பரபரப்பாக இருந்தவரிடம் 'ஹாய்' சொன்னோம்.

போட்டியில் பறந்து வரும் பந்தை ராக்கெட் வேகத்தில் அடிக்கும் ஐஸின் பேச்சில் அவ்வளவு நிதானம்.

'எப்படி சாத்தியமாச்சு இந்த உயரம்?' என்று கேட்டால், எளிமை கலந்து வருகிறது பதில்...

"சின்ன வயதில் பள்ளியில் படிக்கும்போது விளையாட்டில் மிகவும் ஈடுபாடாக இருந்தேன். நான்காம் வகுப்பு படிக்கும்போது, அங்கிருந்த டேபிள் டென்னிஸ் கோச்சர்களான கிறிஸ்டோபர் அனாஸ் மற்றும் நாகம்பிரசாத் ஆகியோர் என்னை டேபிள் டென்னிஸ் பிரிவில் சேர்த்து, சிறப்பாக பயிற்சி அளித்தனர்.

கிட்டத்தட்ட பத்துவருடங்கள் அவர்களிடம் பயிற்சி பெற்றேன். மாவட்டம், மண்டலம், மாநில மற்றும் தேசிய அளவில் நூற்றுக்கும் மேற்பட்ட பதக்கங்களை வென்றேன். இந்த வருடம் நேரு ஸ்டேடியத்தில் இயங்கும் டேபிள் டென்னிஸ் பயிற்சி மையத்தில் இணைந்து பயிற்சி பெற்று வருகிறேன்.

இங்கே சர்வதேச புகழ் பெற்ற பயிற்சியாளர்கள் சீனிவாசராவ் மற்றும் முரளிதர ராவ் ஆகியோர் பயிற்சி அளித்து வருகின்றனர்" என்றார்.

தனது வெற்றிகள் குறித்து பேசுகையில், "தேசிய, மாநில அளவில் நூற்றுக்கணக்கான பதக்கங்களை வென்றிருந்தாலும், 2005-ம் ஆண்டில் சென்னையில் நடந்த தேசிய அளவிலான சப்ஜூனியர் போட்டியில் தங்கம் வென்றதையும், 2009-ம் ஆண்டில் மாநில அளவில் சாம்பியன் பட்டம் வென்றதையும் எனது வாழ்க்கையில் மறக்க முடியாது!" என்று நெகிழ்ச்சியுடன் கூறுகிறார்.

"எதிர்காலத்தில் ஒலிம்பிக் போட்டியில் இந்தியாவுக்கு பதக்கம் வாங்கி, உலக சாம்பியன் பட்டம் பெற வேண்டும். அடுத்து சர்வதேசப் போட்டிகளில் வெற்றிகளை குவிக்க வேண்டும். இப்போதைக்கு இதுதான் டார்கெட்" என்று கனவுத் திட்டங்களைப் பட்டியலிடுகிறார் ஐஸ்வர்யா.

தனது பயிற்சி குறித்து கூறுகையில், "தினமும் அதிகாலை ஆறு மணிக்கெல்லாம் நேரு ஸ்டேடிய மைதானத்தில் ரன்னிங், ஜாகிங் மற்றும் ஜம்பிங் செய்வேன். அப்புறம் டேபிள்டென்னிஸ் பயிற்சி. அதேபோல் மாலையில் ஸ்கிப்பிங் மற்றும் ஜிம் பயிற்சி. அப்புறம் டேபிள் டென்னிஸ் பயிற்சியை மேற்கொள்வேன்.

பத்தாம் வகுப்பு படிக்கும்போது ஒருநாள் பயிற்சியில் ஈடுபட்டிருந்தேன். அப்போது எதிர்பாராத விதமாக கீழே விழுந்ததில் வலது முழங்காலில் பலத்த அடி ஏற்பட்டது. இதில் எலும்பு முறிந்து மூன்று மாதம் சிகிச்சை மேற்கொண்டேன். அதன்பின்னர் கடும்பயிற்சி எடுத்து போட்டியில் பங்கேற்றேன்" என்று தனக்கு ஏற்பட்ட சோதனைகளையும் நினைவு கூறுகிறார். டேபிள் டென்னிஸ் தவிர, செஸ், கீபோர்டு, கித்தார் ஆகியவற்றிலும் பயிற்சி பெற்றுள்ளார் ஐஸ்வர்யா.

பெர்சனல்...

செல்லப் பெயர்: 'ஐஸூ...'

சொந்த ஊர்: சென்னை

படிப்பு: பி.காம்.,

பெற்றோர்: அப்பா குமார் போட்டோகிராபர். அம்மா ஜெயலெட்சுமி ஆடிட்டிங் அலுவலகத்தில் பணிபுரிகின்றார்.

ரோல்மாடல்: டேபிள்டென்னிஸ் வீராங்கனைகளான ஷாமினி மற்றும் வித்யா.

முதல் வெற்றி: 2003-ம் ஆண்டில் சென்னையில் நடந்த 'கேடட்' போட்டியில் மாநில அளவில் சாதனை புரிந்தது.

சென்டிமெண்ட்: அப்படி எதுவும் இல்லை.

எதிர்காலக் கனவு: அடுத்து எம்.பி.ஏ., படித்து அரசு வேலையில் இருக்கவேண்டும்.

படிப்பில்..: 70 சதவீதம்...

பிடித்த நிறம்: பிங்க், புளூ

பிடித்த உணவு: பிரியாணி

பிடித்த உடை: புடவை

பிடித்த நாடு: இந்தியா

பிடித்த வீரர், வீராங்கனை: சச்சின், சாய்னா.

சின்ன வயது கனவு: ராணுவத்தில் சேரவேண்டும் என்று ஆசை.

சந்திக்க விரும்பும் நபர்: நடிகர் சூர்யா.

பலம்: சூழ்நிலைக்கு ஏற்றவாறு என்னை அட்ஜஸ்ட் பண்ணிக்கொள்வேன்.

பலவீனம்: கொஞ்சம் சோம்பேறித்தனம்...!

காதல்: சரியான நபராக இருக்கும் பட்சத்தில் காதல் தவறில்லை!

மறக்க முடியாத பாராட்டு: 2006-ம் ஆண்டில் முன்னாள் முதல்வர் ஜெயலலிதாவிடம் பாராட்டு மற்றும் சான்றிதழ் பெற்றதை மறக்க முடியாது.