மத வன்முறை தடுப்பு சட்டம் மாநில அரசு உரிமைக்கு எதிரானது: ஜெயலலிதா

மத்திய அரசு கொண்டுவர திட்டமிட்டுள்ள மத வன்முறை தடுப்பு சட்டம் மாநில அரசு உரிமைக்கு எதிரானது என்று தமிழ்நாடு முதல்வர் ஜெயலலிதா கூறியுள்ளார்.

முதல் அமைச்சர் ஜெயலலிதா இன்று வெளியிட்டுள்ள அறிக்கையில் கூறியிருப்பதாவது:-

மதக்கலவரம் மற்றும் திட்டமிட்ட வன்முறை தடுப்பு சட்ட மசோதாவை வரும் பாராளுமன்ற கூட்டத் தொடரில் அறிமுகப்படுத்த மத்திய அரசு முடிவு செய்திருப்பதாக செய்திகள் வெளியாகி உள்ளன. இந்த மசோதாவுக்கு தமிழ்நாடு அரசு சார்பாகவும், அ.தி.மு.க. சார்பிலும் எனது ஆட்சேபனையை தெரிவிக்க விரும்புகிறேன்.

மசோதாவின் நோக்கம் புரிந்து கொள்ள கடினமானதாகவும், பல்வேறு யூகங்களுக்கு வழி வகுப்பதாகவும் இருக்கின்றது. இந்த மசோதாவை மேலோட்டமாக படித்த போதே, மசோதாவில் குறிப்பிட்டுள்ள அடைய வேண்டிய நோக்க வழிமுறைகளில் நிறைய தவறுகள் காணப்படுகின்றன. பல்வேறு மதங்களையும், மொழிகளையும், பன்முக கலாச்சாரங்களையும், மதச்சார்பின்மையும் கொண்ட இந்தியாவில், மதம் மற்றும் திட்டமிட்ட வன்முறைக்கு இடமில்லை என்பதை அமைதியை விரும்புபவர்களும், மதச்சார்பின்மை வாதிகளும் ஒப்புக்கொள்ளவே செய்வார்கள். ஆனால் இந்த மசோதா நாம் விரும்பிய இலக்கை, நோக்கத்தை நிறைவேற்றாது. மாறாக பல்வேறு குழுக்களிடையே நம்பிக்கை இன்மையை வளர்க்கவே உதவும். சுருக்கமாக சொன்னால் இந்த மசோதா மதம் மற்றும் திட்டமிட்ட வன்முறை என்ற நோய்க்கு தீர்வு அளிக்காமல் மேலும் மோசமாக்கும்.

சட்ட மசோதாவின் 3-வது பிரிவு ஆண் அல்லது ஒரு பெண்ணின் அடிப்படை உரிமைகளை பாதிப்பதாக அமைந்துள்ளது. மதம் மற்றும் திட்டமிட்ட வன்முறை தடுப்பு சட்டம் பிரிவுகள் 7 முதல் 12 வரை இந்த சட்டத்தின் கீழ் வரும் குற்றங்கள் பட்டியலிடப்பட்டுள்ளன. இதில் கூறப்பட்டுள்ள விசயங்கள், அதிகார வர்க்கத்தினரால் துஷ்பிரயோகம் செய்யவே வாய்ப்புகள் உள்ளன. பிரிவு 18-ல் அரசு ஊழியர்களின் பொறுப்புகள் பற்றி கூறப்பட்டுள்ளது.

வன்முறை மற்றும் திட்டமிட்ட வன்முறை நடக்கும் பட்சத்தில் அதை தடுக்க நடவடிக்கை எடுக்கவில்லை என்று கீழ்மட்ட அதிகாரிகள் மீது குற்றம்சாட்டி உயர் அதிகாரிகள் தப்பித்துக் கொள்ள முடியும். இதனால் இந்த மசோதாவினால் ஆபத்து இரட்டிப்பாகும். இந்த சட்டம் மாநில அரசின் அதிகாரங்களை குறைக்கிறது. மாநில சுயாட்சி கொள்கைகளுக்கு விரோதமானதாக உள்ளது. இந்த மசோதாவில் கூறப்பட்டுள்ள குற்றங்களை கையாள, மாநில அரசுகளால் சுதந்திரமாக சிறப்பு வக்கீலை நியமிக்கும் அதிகாரம் கூட கிடையாது. மத்திய அரசிடம் இருந்து முன் அனுமதி பெற்றே நியமிக்க முடியும். இது போன்ற சரத்துக்களால் மாநில அரசு ஒரு கண்காணிப்பாளராகத் தான் இருக்க முடியுமே தவிர தடுப்பு நடவடிக்கைகளை உடனடியாக எடுக்க முடியாது.

இந்த சட்டம் நிறைவேற்றப்பட்டால் மத்திய அரசின் ஆதிக்கமே மேலோங்கும். மத்திய-மாநில உறவுகள் குறித்து சர்க்காரியா கமிசன் பரிந்துரை செய்துள்ள விதிகளை மீறுவதாக உள்ளது. இது வேண்டாத மாநில அரசுகளை பழிவாங்க பயன்படுத்தப்படும் அரசியல் சட்டம் 356-வது பிரிவின் புதிய வடிவமாக உள்ளது. இந்த சட்டமானது ஜனநாயகத்துக்கு விரோதமானது. எனவே அரசியல் கட்சிகள், சமுதாய தலைவர்கள், சிந்தனையாளர்கள், ஊடகங்கள் மற்றும் பொதுமக்கள் அனைவரும் இந்த சட்டத்துக்கு கடும் எதிர்ப்பு தெரிவிக்க வேண்டும் என்று கேட்டுக் கொள்கிறேன். இவ்வாறு ஜெயலலிதா கூறியுள்ளார்.