ஐ.தே.க நெருக்கடி: கருவுக்கு ரணில் அழுத்தம்

by **நண்பன்** Thu 4 Aug 2011 - 4:05

ஐ.தே.க நெருக்கடி: கருவுக்கு ரணில் அழுத்தம்
நிரூஷி விமலவீர
ஐக்கிய தேசியக் கட்சியின் தலைமைத்துவ நெருக்கடி சூடுபிடித்துள்ள நிலையில் நேற்று ஐக்கிய தேசியக் கட்சித் தலைவர் ரணில் விக்கிரமசிங்க பிரதித் தலைவர் கரு ஜயசூரியவை அழைத்து தாம் ஐ. தே. க தலைமைத்துவத்தைப் பொறுப்பேற்கத் தயாரென கூறியதை ஊடகவியலாளர் மாநாடு ஒன்றினை நடாத்தி மறுதலிக்குமாறு கூறியதாக ஐ.தே.க வட்டாரங்கள் தெரிவிக்கின்றன.

எனினும், தாம் கூறிய கூற்றினை மறுதலிக்க கருஜயசூரிய மறுத்து விட்டதாகவும், இதையடுத்து இருவரும் முறுகல் நிலையில் அங்கிருந்து பிரிந்து சென்றதாகவும் மேலும் தெரியவருகின்றது.

ரணில் விக்கிரமசிங்க தமக்கு சார்பாக பாராளுமன்ற உறுப்பினர்களை ஐவர், ஐவராக அழைத்து தமக்கு ஆதரவு தெரிவிக்குமாறு கூறிவருவதாகவும், அதற்கு அவர்கள் சஜித் - கரு ஆகிய இருவரையும் அழைத்து முதலில் சுமுக நிலைக்கு வருமாறும் அதன் பின்னர் தாம் ஆதரவு வழங்குவது தொடர்பாக சிந்திப்பதாகவும் கூறியுள்ளதாக ஐக்கிய தேசியக் கட்சி வட்டாரங்களிலிருந்து மேலும் தெரியவருகிறது.

இந்நிலையில், மேல் மாகாண சபை மற்றும் தென் மாகாண சபை என்பவற்றின் ஐ.தே.க உறுப்பினர்கள் உடனடியாக ரணில் விக்கிரமசிங்க பதவி விலக வேண்டுமென கடிதமொன்றில் கைச்சாத்திட்டு வருவதாகவும் கூறப்படுகின்றது.

மேலும் தேசிய பிக்கு முன்னணியின் முக்கிய தேரர் ஒருவர் பிற்போடப்பட்டுள்ள 23 உள்ளூராட்சி மன்றங்களுக்கான தேர்தல் நடாத்தப்படுவதற்கு முன்னர் ஐக்கிய தேசியக் கட்சியின் தலைமைப் பதவியிலிருந்து ரணில் விக்கிரமசிங்க விலக வேண்டுமென நெருக்கடி கொடுத்துவருவதாக ஐ. தே. க வட்டாரத்திலிருந்து மேலும் கூறப்படுகின்றது.