சர்ச்சைக்குரிய தீவுப் பகுதிக்கு ஜப்பான் எம்.பிக்கள் நுழைய முயற்சி தென்கொரியா கடும் கண்டனம்

சர்ச்சைக்குரிய தீவுப் பகுதிக்கு ஜப்பான் எம்.பிக்கள் நுழைய முயற்சி
தென்கொரியா கடும் கண்டனம்
இரு நாடுகளுக்கு இடையே பிரச்சினைக்குரிய தீவுப் பகுதிக்கு ஜப்பான் எம்.பிக்கள் செல்ல முயன்றதற்கு தென்கொரியா கடும் கண்டனம் தெரிவித்துள்ளது. இது தொடர்பாக ஜப்பான் தூதரை அழைத்து அவரிடம் அதிருப்தி தெரிவித்துள்ளது தென் கொரியா.

ஜப்பான் மொழியில் தகெஷிமா என்றும், கொரிய மொழியில் டோக்டோ என்றும் அழைக்கப்படும் தீவு மீது இரு நாடுகளும் நீண்ட காலமாக உரிமை கொண்டாடி வருகின்றன. ஜப்பானுக்கு கிழக்கில் உள்ள மனிதர்கள் வசிக்காத, பாறைகளும், அடர்ந்த மரங்களையும் கொண்டுள்ள இந்தத் தீவு இப்போது தென் கொரியாவின் கட்டுப்பாட்டில் உள்ளது. இந்நிலையில் ஜப்பானைச் சேர்ந்த 3 எம்.பிக்கள் இந்தத் தீவுக்கு திங்கட்கிழமை செல்ல முயன்றனர். அவர்கள் இதற்காக தென் கொரிய தலைநகர் சியோலுக்கு வந்தனர். ஆனால் அவர்கள் மூவரையும் விமான நிலையத்திலேயே தடுத்து நிறுத்திவிட்டனர்.

அவர்களை உடனடியாக தென் கொரியாவுக்கு திரும்பிச் செல்லவும் அனுமதிக்கவில்லை. 9 மணி நேரம் விமான நிலையத்திலேயே காத்திருக்க வைத்துவிட்டனர். எம்.பிக்களை விடுவிக்க ஜப்பான் எவ்வளவோ முயற்சித்தும் தென் கொரியா உரிய பதிலை அளிக்க வில்லை. ஜப்பான் எம்.பிக்களை நீண்டநேரம் காத்திருக்க வைத்து பின்னர் திங்கட்கிழமை இரவுதான் அவர்களது நாட்டுக்கு செல்ல அனுமதித்தது. இதனால் இரு நாடுகளுக்கும் இடையேயான உறவில் விரிசல் அதிகரித்துள்ளது.

தென் கொரியாவின் இத்தகைய நடவடிக்கை வருத்தத்துக்குரியது என்றும், இதனால் இரு நாடுகளிடையேயான அனைத்துத் தரப்பு உறவும் பாதிக்கப்படும் என்றும் ஜப்பான் குறிப்பிட்டுள்ளது.

ஆனால் இரு தரப்பு உறவு பாதிப்பதைப் பற்றி எங்களுக்கு கவலையில்லை என்று தென் கொரியா தெரிவித்துள்ளது. டோக்டோ தீவு தங்களுக்கு சொந்தமானது என்றும், அங்கு ஜப்பானியர் யாரையும் அனுமதிக்க முடியாது என்றும் கூறியுள்ளது.

:”@: