சீமெந்திற்கான செயற்கைத் தட்டுப்பாட்டுக்கு முற்றுப்புள்ளி

அத்தியாவசியப் பொருட்களை பதுக்குவோர் மீது அரசு நடவடிக்கை
சீமெந்திற்கான செயற்கைத் தட்டுப்பாட்டுக்கு முற்றுப்புள்ளி
கடந்த 6 மாத காலத்தில் நாடெங்கிலும் 20,000 சுற்றிவளைப்புகள்
லோரன்ஸ் செல்வநாயகம்
அத்தியாவசியப் பொருட்களைப் பதுக்கி வைத்தல் அதிக விலையில் விற்றல் தொடர்பான 20,000 சுற்றி வளைப்புக்கள் கடந்த 6 மாத காலங்களில் நடத்தப்பட்டுள்ளதுடன் இதன் மூலம் 48 மில்லியன் ரூபா தண்டப் பணம் அரசாங்கத்துக்கு கிடைத்துள்ளது என அமைச்சர் ஜோன்ஸ்டன் பெர்னாண்டோ தெரிவித்தார்.

நுகர்வோரைப் பாதுகாக்கும் வகையில் அடுத்து வரும் ஆறு மாத காலத்தில் 50,000 சுற்றி வளைப்புக்களை நடத்துவதற்குத் தீர்மானித்துள் ளதாகத் தெரிவித்த அமைச்சர், நாடளாவிய ரீதியில் அதற்கான நடவடிக்கைகள் முன்னெடுக்கப் பட்டுள்ளதாகவும் தெரிவித்தார்.

சீமெந்து, அரிசி போன்றவற்றைப் பதுக்கி வைத்து அவற்றுக்குத் தட்டுப்பாடு நிலவுவதாகக் காட்டி பின்னர் அதிக விலைக்கு விற்பதற்கு வர்த்தகர்கள் சிலர் முயன்றனர். நுகர்வோர் பாதுகாப்பு அதிகார சபை அதிகாரிகளின் சுற்றிவளைப்பு காரணமாக அம் முயற்சி தோற்கடிக்கப்பட்டது.

அதேவேளை, அத்தியாவசியப் பொருட்களின் விலைப் பட்டியலைக் காட்சிப் படுத்தாக வர்த்தகர்களுக்கு எதிராக சட்ட நடவடிக்கை எடுக்கப்படுமெனவும் அமைச்சர் தெரிவித்தார்.

இதேவேளை சீமெந்துத் தட்டுப்பாட்டுக்கு எதிர்வரும் திங்கட்கிழமையுடன் முற்றுப்புள்ளி வைக்கப்படுமென அமைச்சர் ஜோன்ஸ்டன் பெர்னாண்டோ தெரிவித்தார்.

தர நிர்ணயம் தொடர்பான விடயங்கள் குறித்து சம்பந்தப்பட்ட அமைச்சருடன் பேச்சுவார்த்தை நடத்தி இறக்குமதி செய்யப்பட்டுள்ள சீமெந்தை சந்தைக்குவிட நடவடிக்கை எடுக்கப்படுமெனவும் அமைச்சர் தெரிவித்தார்.

கொழும்பில் நேற்று நடைபெற்ற செய்தியாளர் மாநாடொன்றில் இது தொடர்பில் தெரிவித்த அமைச்சர்; தரநிர்ணய சான்றிதழைப் பெற்றுக் கொள்வதில் ஏற்பட்ட அநாவசிய தாமதமே சீமெந்து பற்றாக்குறைக்கான காரணமெனவும் தெரிவித்தார்.

இது தொடர்பில் அவர் மேலும் தெரிவிக்கையில் :-

சீமெந்து பக்கற்றுகளைப் பதுக்கி வைத்து அதனை கூடிய விலையில் விற்பனை செய்ய முயன்றவர்களை இனங்கண்டு அவர்களுக்கு ஏதிராக சட்ட நடவடிக்கை எடுக்குமாறு நான் நுகர்வோர் பாதுகாப்பு அதிகார சபை அதிகாரிகளுக்கு பணிப்புரை விடுத்துள்ளேன்.

இறக்குமதி செய்யப்பட்ட சீமெந்தினைத் துறைமுகத்திலிருந்து பொறுப்பேற்பதில் சில ஆவணங்கள் பூர்த்தி செய்யப்பட வேண்டியுள்ளன. அந்த நடவடிக்கைகள் நிறைவுபெற்றதும் ச. தொ. ச. மூலம் இறக்குமதி செய்யப்பட்ட சீமெந்து விற்பனைக்கு விடப்படும் எனவும் அவர் தெரிவித்தார். யுத்தத்திற்குப் பின்னரான அபிவிருத்தி நடவடிக்கைகள் காரணமாக முன்னரைவிட 22 வீதம் மேலதிக சீமெந்து தேவை நாட்டில் உள்ளது எனக் குறிப்பிட்ட அமைச்சர், எவ்வாறா யினும் எதிர்வரும் இரண்டு வாரங்களில் போதியளவு சீமெந்தை நாட்டில் எப்பகுதியிலும் பெற்றுக் கொள்ள நடவடிக்கை எடுக்கப்படுமெனவும் அமைச்சர் மேலும் தெரிவித்தார்.

நல்ல அம்சம்தான் பகிர்வுக்கு நன்றி தொடர்ந்து தாருங்கள்