தமிழக பட்ஜெட்டில் சம்பள உயர்வு அறிவிக்காததால் டாஸ்மாக் ஊழியர்கள் ஏமாற்றம்

புளியங்குடி: தமிழக பட்ஜெட்டில் சம்பள உயர்வு அறிவிக்கப்படாததால் டாஸ்மாக் ஊழியர்கள் ஏமாற்றம் அடைந்துள்ளனர்.
தமிழ்நாட்டில் 2003ம் ஆண்டில் டாஸ்மாக் நிர்வாகத்தின் கீழ் 32 மாவட்டங்களிலும் 6 ஆயிரத்து 500 மதுக்கடைகள் திறக்கப்பட்டன. இதற்காக வேலைவாய்ப்பு அலுவலகம் மூலம் 36 ஆயிரம் ஊழியர்கள் நியமிக்கப்பட்டனர்.
கடை மேற்பார்வையாளர்களுக்கு தொகுப்பூதியமாக மாதம் ஸீ2 ஆயிரம், விற்பனையாளர்களுக்கு ஸீ1500, பார் உதவியாளர்களக்கு ஸீ1,100 என்ற ஊதியத்தை அதிமுக அரசு வழங்கி வந்தது. தற்போது தொகுப்பூதியமாக மேற்பார்வையாளர்கள் ஸீ4,500, விற்பனையாளர்கள் ஸீ3,200, பார் உதவியாளர்கள் ஸீ2,400 என்ற சம்பளம் பெற்று வருகின்றனர்.
திமுக ஆட்சியின் போது ஜெயலலிதா உத்தரவுப்படி அண்ணா தொழிற்சங்க மாநில தலைவர் சின்னச்சாமி தலைமையில் ஈரோட்டிலும், திருச்சியிலும், சேலத்திலும் நடந்த ஆர்ப்பாட்டத்தில் டாஸ்மாக் ஊழியர்களுக்கு 8 மணி நேர பணி, ஊதிய உயர்வு உள்ளிட்ட 11 கோரிக்கைகள் வலியுறுத்தப்பட்டன. அப்போது ஜெயலலிதா வெளியிட்ட அறிக்கையில், “டாஸ்மாக் ஊழியர்கள் பணி நிரந்தரம் மற்றும் எதிர்பார்ப்பு வெகு தொலைவில் இல்லை“ என கூறியிருந்தார். இதையடுத்து டாஸ்மாக் ஊழியர்கள் மற்றும் குடும்பத்தினர் பலர் அதிமுகவுக்கு வாக்களித்தனர். ஆனால் சமீபத்தில் சட்டசபையில் தாக்கல் செய்யப்பட்ட பட்ஜெட்டில் டாஸ்மாக் ஊழியர்களுக்கான வேலை நேரம், ஊதிய உயர்வு, நிரந்தரப்படுத்துவது உள்ளிட்ட கோரிக்கைகள் குறித்து எந்த அறிவிப்பும் இடம் பெறவில்லை.
இதேபோல் டாஸ்மாக் கடைகளில் பணியாற்றும் 1400 பிஎட், பட்டதாரிகளுக்கும், மாற்றுத்திறனாளிகளுக்கும், ஆசிரியர் மற்றும் இதர துறைகளில் பணியிட மாற்றம் வழங்கவும் பணி நிரந்தரம் மற்றும் காலமுறை ஊதியம் வழங்கவும் அரசு நடவடிக்கை எடுக்க வேண்டும் என்று டாஸ்மாக் ஊழியர்கள் எதிர்பார்க்கின்றனர்.