ஜுபிடர் செல்லும் ஜூனோ

வியாழன் கிரகத்துக்கு ஆளில்லா விண்கலம் ஒன்றை அமெரிக்க விண்வெளி ஆய்வு நிறுவனமான நாஸா அனுப்புகிறது.

ஜூனோ என்று பெயரிடப்பட்டுள்ள இந்த விண்கலம் வெள்ளிக்கிழமையன்று ஜிஎம்டி நேரப்படி 15:34க்கு பின்னர் கிளம்புகிறது.

ஐந்து ஆண்டுகள் பயணத்துக்குப் பின்னர் 2016ஆம் ஆண்டு இது ஜூபிடர் எனப்படுகின்ற வியாழன் கிரகத்தை சுற்றிவரத் துவங்குமாம்.
சூரிய சக்தியில் இயங்கும்

நூற்று பத்து கோடி டாலர் பெறுமதி கொண்டது இந்த ஆளில்லா விண்வெளிப் பயணத் திட்டம்.

தவிர சூரிய வெளிச்சதியில் இருந்து எரிசக்தியைப் பெறுகின்ற ஒரு விண்கலம் சூரியனுக்கு அப்பால் இவ்வளவு அதிக தூரம் அனுப்பப்படுவது இதுவே முதல் முறை.

வாயுக்கள் நிறைந்த இந்த ராட்சத கிரகத்தில் சூரிய ஒளியின் அளவு பூமியில் விழுகின்ற அளவுக்கு இருபத்து ஐந்தில் ஒரு பாகமே இருக்கும்.

ஆதலால் சாதாரணமாக இவ்வளவு தூரத்துக்கு அனுப்பப்படுகின்ற விண்கலங்கள், புளூடோனியம் பேட்டரிகளில் இருந்து மின்சக்தியைப் பெறும் வகையில்தான் வடிவமைக்கப்பட்டிருக்கும்.

ஆனால் இந்த ஜூனோ விண்கலத்தின் மூன்று இறக்கைகளிலுமாக மொத்தம் பதினெட்டாயிரம் சோலார் செல்கள் அமைந்திருப்பதால் அந்த குறைந்த ஒளியிலும் போதுமான எரிசக்தியை இது பெற்றுவிடும் என்று தெரிவிக்கப்படுகிறது.
பயணத்தின் நோக்கம்

"பிரபஞ்சம் தொடர்பில் நமக்குள்ள புரிதலை ஆழப்படுத்திக்கொள்ள இப்படி விண்கலங்களை நாம் அனுப்புவதென்பது மிகவும் முக்கியம்"

நாஸா விஞ்ஞானி ஸ்டீவன் லெவென்

சூரிய குடும்பத்தின் மிகப் பெரிய கிரகமான வியாழன் கிரகத்தின் தோற்றம், பரிணாம மாற்றங்கள் என்பனவற்றை ஆராய்ந்து புரிந்து கொள்வதன் மூலம் சூரியக் குடும்பத்தின் இரகசியங்களைக் கண்டறிவது என்பது ஜூனோவுடைய பயணத்தின் நோக்கம்.

பிரபஞ்சம் தொடர்பில் நமக்குள்ள புரிதலை ஆழப்படுத்திக்கொள்ள இப்படி விண்கலங்களை நாம் அனுப்புவதென்பது மிகவும் முக்கியம் என்று நாஸா விஞ்ஞானியான ஸ்டீவன் லெவென் கூறுகிறார்.

தொலைவிலுள்ள விடயங்களை உணர்ந்து ஆராயும் இந்த விண்கலத்தின் ரிமோட் சென்சர் கருவிகள் வியாழன் கிரகத்தின் பல படிவங்களை ஆராயும், வியாழன் கிரகத்தில் அதிகமாகக் காணப்படும் தனிமங்கள், அதன் தட்ப வெப்ப நிலை, அதன் இயக்கம் மற்றும் இயற்கை அம்சங்களை ஆராயும்.

வியாழன் கிரகத்தைச் சுற்றியுள்ள பிரம்மாண்டமான வாயு வெளியில் எந்த அளவுக்கு தண்ணீர் இருக்கிறது என்பதையும் விஞ்ஞானிகள் கண்டறிய விரும்புகின்றனர். ஏனெனில் சூரிய குடும்பம் உருவான சமயத்தில் வியாழன் கிரகப் பகுதியில் எந்த அளவு பிராணவாயுவான ஆக்ஸிஜன் இருந்தது என்பதன் அறிகுறியாக இது அமையும்.

தவிர வியாழன் கிரகம் முழுக்கவே வாயுக்களால் ஆனது,அதில் திடப் பொருள் எதுவும் இல்லை என்று ஒரு சிலரும், வாயுவெளிக்கு உள்ளே திடப் பொருள் இருக்கத்தான் செய்கிறது என்று வேறு சிலரும் பலகாலமாக செய்துவரும் வாதத்துக்கு இந்த ஜூனோ ஒரு முற்றுப்புள்ளி வைத்துவிடும்.
நன்றி. பிபிசி தமிழ்