வவுனியா நகர சபை உறுப்பினர்கள் அடையாள உண்ணாவிரதப் போராட்டம்

வவுனியா நகர சபை உறுப்பினர்கள் அடையாள உண்ணாவிரதப் போராட்டம்
மகேஸ்வரன் பிரசாத், வவுனியா விசேட நிருபர்
வவுனியா நகரசபை எல்லைக்குட்பட்ட பட்டாணிச்சி புளியங்குளம் மையவாடிக்குச் சொந்தமான காணியில் கடைகள் கட்டப்படுவதை உடன் நிறுத்தக் கோரியும், நகரசபைத் தலைவர் மற்றும் உபதலைவர் ஆகியோருக்கு அச்சுறுத்தல் விடுக்கப்பட்டதைக் கண்டித்தும் நேற்று வவுனியா நகரசபை முன்றலில் அடையாள உண்ணாவிரதப் போராட்டமொன்று நடத்தப்பட்டது.

முஸ்லிம் மையவாடிக்குச் சொந்தமான காணிக்குள் கடைகள் கட்டப்படுவதற்கு நகரசபை எதிர்ப்புத் தெரிவித்திருந்த நிலையில், அண்மையில் கடைகள் கட்டுவதற்கான முயற்சிகள் முன்னெடுக்கப்பட்டி ருப்பதாகவும், இச்சம்பவம் தொடர்பில் நகரசபைத் தலைவர் மற்றும் உபதலைவருக்கு சில தரப்பினர் அச்சுறுத்தல் விடுத்திருப்பதாகவும் வவுனியா நகரசபை வட்டாரங்கள் தெரிவித்தன.

இவற்றைக் கண்டித்து வவுனியா நகரசபை முன்றலில் நகரசபை உறுப்பினர்கள் மற்றும் அவர்களுக்கு ஆதரவான ஏனைய பிரதேசசபை உறுப்பினர்களும் அடையாள உண்ணாவிரதப்போராட்டத்தில் ஈடுபட்டனர். சம்பவ இடத்துக்குச் சென்ற சிரேஷ்ட பொலிஸ் அத்தியட்சகர் அமரசிறி சோனாரட்ன விபரங்களைக் கோட்டறிந்து கொண்டதன் பின்னர் உண்ணாவிரதப் போராட்டம் முடிவுக்குக் கொண்டுவரப்பட்டது.

இதற்கு ஆதரவாக வவுனியா நகரில் சில கடைகள் மூடப்பட்டிருந்தபோதும், சிறிது நேரத்தில் கடைகள் யாவும் திறக்கப்பட்டு நகரின் வர்த்தச் செயற்பாடுகள் வழமைக்குத் திரும்பியிருந்தன.