தடுத்து வைக்கப்பட்டுள்ள இலங்கை தமிழர் அவுஸ்திரேலியாவில் உண்ணாவிரதப் போராட்டம்

அவுஸ்திரேலிய கிறிஸ்மஸ் தீவுக்கு அருகில் உள்ள
வில்லாவுட் தடுப்பு முகாமில், கதிர் என்ற புனைபெயரை கொண்ட தமிழர் கடந்த
ஏழு நாட்களாக உண்ணாவிரதப் போராட்டத்தில் ஈடுபட்டுள்ளதாக
தெரிவிக்கப்பட்டுள்ளது
தம்முடைய அகதி அந்தஸ்து கோரிக்கைக்கு
விதிக்கப்பட்டுள்ள அசாதாரண நடவடிக்கைகளுக்கு எதிர்ப்பு தெரிவித்தே இந்த
இலங்கை தமிழர் போராட்டத்தை நடத்தி வருகிறார்.
கதிர், 1990 மற்றும் 1991 ஆம் ஆண்டுகளில் தமது இரண்டு சகோதரர்களை
இழந்துள்ளார். இதில் ஒருவர் பல்கலைக்கழகத்தில் நடத்தப்பட்ட படையினரின்
தாக்குதலில் கொல்லப்பட்டவராவார்.
1990 ஆம் ஆண்டு கதிரின் தந்தை கடத்திச்செல்லப்பட்டார். இதுவரை அவர் எங்கிருக்கிறார் என்பது தெரியவரவில்லை.
இந்தநிலையில் 2009 ஆம் ஆண்டு 193 அகதிகளுடன் அவுஸ்திரேலியா சென்ற அகதிகள் படகின் மூலம் கதிரும் அவுஸ்திரேலியாவுக்கு சென்றுள்ளார்.
இவருடன் படகில் சென்ற 193 பேரில் 188 பேருக்கு அவுஸ்திரேலியாவில் அகதி அந்தஸ்து வழங்கப்பட்டுள்ளது.
அவுஸ்திரேலியாவின் சமூகத்துடன் இணைவதற்கு அந்த நாட்டின் புலனாய்வுத்துறை
விடுகை அனுமதியை அகதி ஒருவர் பெறவேண்டும். எனினும் உண்ணாவிரதப்
போராட்டத்தில் ஈடுபட்டு வரும் கதிர், தமிழீழ விடுதலைப்புலிகளின்
நடவடிக்கைகளில் ஈடுபட்டார் என்ற குற்றச்சாட்டின் அடிப்படையில் இன்னமும்
அந்த அங்கீகாரத்தை பெறவில்லை.
தமிழீழ விடுதலைப்புலிகளுடன் தொடர்புகொண்டிருந்த குறிப்பாக அவர்களின்
கீழ் பணியாற்றிய ஆசிரியர்கள் மற்றும் சுகாதார ஊழியர்களும் தமிழீழ
விடுதலைப்புலிகளுடன் தொடர்புடையவர்களாக கருதப்படுகின்றனர்.
2002 ஆம் ஆண்டு முதல் 2006 ஆம் ஆண்டு வரையிலான போர் நிறுத்த காலத்தில்
பணியாற்றியவர்களும் இந்த குற்றத்துக்குள் அடக்கப்படுவதாக அவுஸ்திரேலிய மனித
உரிமை அமைப்புகள் குற்றம் சுமத்தியுள்ளன.
2009 ஆம் ஆண்டு அவுஸ்திரேலியாவின் குடிவரவு திணைக்களம், கதிரை உண்மையான
அகதியாக ஏற்றுக்கொண்டது. எனினும் புலனாய்வுப்பிரிவு அவருக்கு விடுகை
அனுமதியை வழங்கவில்லை. இருப்பினும் அவரை நாடுகடத்த முடியாது என்பதே கதிர்
தரப்பு மனித உரிமை அமைப்புகளின் நிலைப்பாடாக உள்ளது.
இலங்கைப் படையினரால் சித்திரவதைக்கு உட்படுத்தப்பட்ட அடையாளங்கள்
கதிரின் உடலில் காணப்படுவதாக அவரின் நண்பர்கள் தெரிவித்துள்ளனர். அத்துடன்
குண்டு வெடிப்பொன்றில் தமது கைவிரல் ஒன்றையும் கதிர் இழந்துள்ளார்.
இந்தநிலையில் தொடர்ந்து 7 வது நாளாக உண்ணாவிரததத்தை மேற்கொண்டு வரும் கதிர், இதுவரை 20 கிலோ வரை நிறை குறைந்துள்ளார்.
தமக்கு எதிரான வழக்கை மீண்டும் தொடர்வதில்லை என அவுஸ்திரேலிய குடிவரவு
திணைக்களம் உறுதியளிக்கும் வரை தாம் உண்ணாவிரதப் போராட்டத்தை
கைவிடப்போவதில்லை என கதிர் குறிப்பிட்டுள்ளார்.