அமைச்சர் மரியம்பிச்சை மரணம் அடைந்த திருச்சி மேற்கு தொகுதியில் 3 மாதத்தில் இடைத்தேர்தல்

by **நண்பன்** Sat 13 Aug 2011 - 9:50

அமைச்சர் மரியம்பிச்சை மரணம் அடைந்த திருச்சி மேற்கு தொகுதியில் 3 மாதத்தில் இடைத்தேர்தல்:

மத்திய தேர்தல் அதிகாரி சம்பத் பேட்டி

சென்னை, ஆக.13-

திருச்சி
மேற்கு தொகுதி யில் அ.தி.மு.க. சார்பில் வெற்றி பெற்று எம்.எல்.ஏ. ஆனவர்
மரியம்பிச்சை. தமிழக அமைச்சரவையில் சுற்றுச்சூழல் துறை அமைச்சரான
மரியம்பிச்சை கடந்த மே மாதம் 23-ந் தேதி சாலை விபத்தில் மரணம் அடைந்தார்.
இதனால் திருச்சி மேற்கு தொகுதியை காலியிடமாக தேர்தல் கமிஷன்
அறிவித்துள்ளது.

சட்டமன்ற உறுப்பினர் மரணம்
அடைந்தால் 6 மாதத்திற்குள் அந்த தொகுதியில் தேர்தல் நடத்த வேண்டும் என்பது
விதி. அதன்படி நவம்பர் மாதத்திற்குள் திருச்சி மேற்கு தொகுதியில் தேர்தல்
நடத்த வேண்டும்.

இதுபற்றி சென்னை வந்த மத்திய தேர்தல் கமிஷனர் சம்பத்தை விமான நிலையத்தில் நிருபர்கள் பேட்டி கண்டனர். அதன் விவரம் வருமாறு:-

கேள்வி:- திருச்சி மேற்கு தொகுதியில் இடைத்தேர்தல் எப்போது நடத்தப்டும்?

பதில்:- இடைத்தேர்தலை நடத்த நவம்பர் 23-ந் தேதி வரை காலஅவகாசம் உள்ளது. அதற்குள் தேர்தல் நடத்தப்படும்.

கே:- இடைத்தேர்தலுக்காக ஆயத்த பணிகளை நடத்த சென்னை வந்திருக்கிறீர்களா?

பதில்:-
சென்னைக்கு எனது சொந்த பயணமாக வந்துள்ளேன். திருச்சி மேற்கு தொகுதி
இடைத்தேர்தலுக்கு ஆயத்த ஏற்பாடுகள் செய்ய தேவையில்லை. ஏற்கனவே உள்ள
ஏற்பாட்டின் படி தேர்தலை நடத்தலாம்.

கே:- தமிழக சட்டசபை தேர்தலில் போட்டியிட்ட வேட்பாளர்கள் தங்களின் தேர்தல் செலவு கணக்குகளை ஒப்படைத்து விட்டார்களா?

பதில்:-
தேர்தலில் போட்டியிட்டவர்கள் தங்களின் தேர்தல் செலவு கணக்குகளை
சமர்ப்பித்து உள்ளனர். தேர்தல் பார்வையாளர்கள் அந்த அறிக்கையின் படி
வேட்பாளர்களின் கணக்குகள் உள்ளதா என ஆய்வு செய்து வருகிறது.

கே:-
மிண்ணணு வாக்கு பதிவு இயந்திரத்தில் யாருக்கு ஒட்டு போட்டோம் என்ற ரசீது
வழங்கும் முறை வருகிற 5 மாநில பொது தேர்தலில் அமுல்படுத்தப்படுமா?

பதில்:-
இது பற்றி தேர்தல் ஆணையம் ஆய்வு செய்து வருகிறது. இந்த முறை சோதனைக்காக
டெல்லி, ஜம்மு-காஷ்மீர், கேரளா உள்பட 5 மாநிலங்களில் நடத்தப்பட்டது. அதன்
முடிவில் உள்ள குறை, நிறைகளை ஆராய்ந்து வருகிறோம். இந்த திட்டத்தில்
தேர்தல் ஆணையத்திற்கு 100 சதவீதம் திருப்தி ஏற்பட்டால் தான்
அமுல்படுத்தப்படும்.

இவ்வாறு அவர் கூறினார்.

பேட்டியின் போது தமிழக தலைமை தேர்தல் அதிகாரி பிரவீன்குமார் உடன் இருந்தார்.

மாலை மலர்