லோக்பால் சட்டம் குறித்து ஹசாரே தவறான அபிப்பிராயம் ஏற்படுத்த முயற்சி; பாராளுமன்றத்தில் பிரதமர் அறிக்க

by **நண்பன்** Wed 17 Aug 2011 - 11:23

புதுடெல்லி, ஆக.17-

சமூக சேவகர் அன்னா
ஹசாரே கைது செய்யப்பட்டது தொடர்பாக பாராளுமன்றத்தில் பிரதமர் மன்மோகன்சிங்
இன்று சிறப்பு அறிக்கை ஒன்றை தாக்கல் செய்தார். சபாநாயகர் மீராகுமார்
அனுமதியின் பேரில் அவர் அறிக்கையை வாசித்தார். அறிக்கையில் பிரதமர்
அன்னாஹசாரே கைது தொடர்பாக நேற்று நடந்த சம்பவங்கள் மிகவும் வருத்த
மளிக்கின்றன. ஹசாரேவும், அவரது ஆதரவாளர்களும் ஜன்லோக்பால் மசோதா
பாராளுமன்றத்தில் நிறைவேற்ற வேண்டும் என்று விரும்புகின்றனர்.

டெல்லி
போலீசார் விதித்த 6 நிபந்தனைகளை ஹசாரே ஏற்கவில்லை. இதனால் அவரை கைது
செய்வதை தவிர போலீசாருக்கு வேறு வழி தெரியாமல் போய் விட்டது. ஒவ்வொரு
குடிமகனும் அமைதியான முறையில் போராட்டம் நடத்துவதற்கு உரிமை இருக்கிறது.
ஆனால் நிபந்தனைகளை ஏற்றுக் கொண்டால்தான் போராட்டத்துக்கு அனுமதி கொடுக்க
முடியும்.

லோக்பால் மசோதா தாக்கல்
செய்யப்பட்டதையும் பொருட்படுத்தாமல் தன்னுடைய ஜன்லோக்பால் மசோதாவை
நிறைவேற்ற வேண்டும் என்று ஹசாரே நிர்ப்பந்தப்படுத்துகிறார். பாராளுமன்ற
நிலைக் குழுவின் பரிசீலனையில் தான் லோக்பால் மசோதா உள்ளது.

ஹசாரே
குழுவினர் நிலைக்குழு முன்பு தங்களது கருத்துக்களை தெரிவித்து இருக்கலாம்.
ஆனால் கருத்து தெரிவிக்க தேர்ந்து எடுத்த பாதை தவறானது. ஊழலை ஒழிப்பதில்
அரசு மற்றும் ஹசாரேயின் நோக்கம் ஒன்றுதான். ஆனால் லோக்பால் சட்டம் குறித்து
ஹசாரே தவறான அபிப்பிராயத்தை ஏற்படுத்த முயற்சிக்கிறார்.

ஊழலை
ஒழிக்க மந்திரகோல் இல்லை. சட்டம் இயற்றும் பாராளு மன்ற உரிமையை யாரும்
கேள்வி கேட்க முடியாது. அனைவரும் ஒப்புக்கொண்ட பிறகே லோக்பால் மசோதா
பாராளுமன்றத்தில் தாக்கல் செய்யப்பட்டுள்ளது. சட்டம் இயற்றுவதை யாரும்
கேள்வி கேட்க இயலாது. தேர்ந்தெடுக்கப்பட்ட மக்கள் பிரதிநிதிகள் பணிகளை
செயல்படுத்த அனுமதிக்க வேண்டும். அனைத்து தரப்பினரும் கைகோர்த்து செயல்பட
வேண்டும். அரசு எந்த ஒரு அமைப்புக்கும் எதிரானது அல்ல. ஆனால் சில
அமைப்புகள் அரசுக்கு கெட்ட பெயரை ஏற்படுத்த முயற்சிக்கின்றனர். அமைதியை
நிலை நாட்டுவது அரசின் கடமையாகும்.
என்று கூறினார்

மாலை மலர்