தமிழக முகாம்களிலுள்ள இலங்கைத் தமிழர்களுக்கு ஜெயலலிதாவினால் உதவிப் பொருட்கள்

by **நண்பன்** Thu 18 Aug 2011 - 4:56

தமிழக முகாம்களிலுள்ள இலங்கைத் தமிழர்களுக்கு ஜெயலலிதாவினால் உதவிப் பொருட்கள்
சென்னை,
முகாம்களில் உள்ள இலங்கை தமிழர்களுக்கு நலத்திட்ட உதவிகளை முதல் அமைச்சர் ஜெயலலிதா வழங்கினார். இது தொடர்பாக தமிழக அரசு நேற்று முன்தினம் வெளியிட்டுள்ள செய்திக் குறிப்பில் கூறப்பட்டுள்ளதாவது :-

முதல் அமைச்சர் ஜெயலலிதா நேற்று முன்தினம் தலைமைச் செயலகத்தில், தமிழக மக்களுக்கு வழங்கப்பட்டு வரும் நலத் திட்டங்கள் அனைத்தும் முகாம் வாழ் இலங்கை தமிழ் மக்களுக்கும் விரிவுபடுத்தப்படும் என்ற அறிவிப்பிற்கிணங்க பல்வேறு திட்டங்களின் கீழ் 17 இலங்கை தமிழ் பயனாளிகளுக்கு நலத் திட்ட உதவிகளை வழங்கினார்.

முதியோர்களுக்கு உதவித் தொகை வழங்கும் திட்டம் ஆதரவற்ற விதவைகளுக்கு உதவித் தொகை வழங்கும் திட்டம், ஆதரவற்ற பெண்களுக்கு உதவித் தொகை வழங்கும் திட்டம், ஏழைப் பெண்கள் திருமண உதவித் திட்டத்தின் கீழ் திருமாங்கல்யத்திற்கான தங்கத்துடன் உதவித் தொகை வழங்கும் திட்டம், பெண்களுக்கு இலவச தையல் இயந்திரங்கள் வழங்கும் திட்டம், பெண் குழந்தைகள் பாதுகாப்பு திட்டம், மகளிர் சுயஉதவி குழுக்களுக்கு சுழல் நிதி வழங்கும் திட்டம், தொழிற் கல்லூரிகளில் படிக்கும் முதல் தலைமுறை பட்டதாரிகளுக்கான கல்வி கட்டண சலுகை போன்ற நலத் திட்டங்கள் முகாம் வாழ் இலங்கை தமிழர்களுக்கும் நீடிக்கப்பட்டுள்ளன.

இதைத் தொடர்ந்து தற்போது தமிழ் நாட்டிலுள்ள பல்வேறு முகாம்களில் இயங்கி வரும் 416 மகளிர் சுய உதவி குழுக்களுக்கு 10,000 ரூபாய் வீதம் சுழல் நிதி வழங்கப்படும் எனவும் திருத்த நிதி நிலை அறிக்கையில் அறிவிக்கப்பட்டுள்ளது. மேலும் முகாம்களில் அடிப்படை கட்டமைப்பு வசதிகளை மேம்படுத்த 25 கோடி ரூபாய் அரசால் அனுமதிக்கப் பட்டுள்ளது. அதுமட்டுமின்றி முகாம் வாழ் இலங்கை தமிழர்கள் பெற்று வந்த மாதாந்திர பணக்கொடையும் உயர்த்தப்பட்டுள்ளது.

முதல் அமைச்சர் ஜெயலலிதாவிடம் இருந்து நலத்திட்ட உதவிகளைப் பெற்றுக் கொண்ட இலங்கை தமிழர்கள், தமிழக மக்களுக்கு வழங்கப்பட்டு வரும் நலத்திட்டங்கள் அனைத்தும் முகாம் வாழ் இலங்கை தமிழ் மக்களுக்கும் விரிவுபடுத்தி தங்கள் வாழ்வில் வளம் காண பல்வேறு நலத்திட்ட உதவிகளை வழங்கிய முதல் அமைச்சர் ஜெயல லிதாவுக்கு தங்களது நெஞ்சார்ந்த நன்றியைத் தெரிவித்துக் கொண்டனர்.