காத்தான்குடி பொதுமக்கள் - படையினர் மோதல்; பொதுமக்களின் உடமைகள் சேதம்!

by **mufees** Sat 20 Aug 2011 - 15:43

காத்தான்குடி பொலிஸ் பிரிவிற்குட்பட்ட பாலமுனைக் கிராமத்தில் நேற்றிரவு மர்ம மனிதன் ஊடுருவிய பதற்றத்தினால் பொலிசாருக்கும் பொதுமக்களுக்கும் இடையில் ஏற்பட்ட முறுகல்நிலை காரணமாக பாலமுனை மற்றும் கர்பலா காத்தான்குடி ஆகிய பிரதேசங்களில் அமைதியின்மை ஏற்பட்டது.

காத்தான்குடியை அண்மித்த ஆரையம்பதி பிரதேச செயலாளர் பிரிவிலுள்ள பாலமுனை கிராமத்தில் மர்ம மனிதர்கள் இருவரின் நடமாட்டம் இருப்பதாக அப்பகுதி மக்கள் தெரிவித்ததையடுத்து அப்பகுதியில் பதற்ற நிலை காணப்பட்டது. இதையடுத்து நேற்றிரவு 11 மணியளவில் பாலமுனை மற்றும் கர்பலா பிரதேசங்களில் பொலிசார் குவிக்கப்பட்டனர்.

இதற்கிடையில் நூறாணியா வீதி- அலியார் சந்தியில் இளைஞர்கள் டயர்களை தீ மூட்டி எரித்து எதிர்ப்புத் தெரிவித்ததையடுது அங்கு முறுகல் நிலை ஏற்பட்டுள்ளது. இந்நிலையில் உடனடியாக சம்பவ இடத்துக்கு வருகை தந்த இராணுவத்தினர் அங்கு கூடியிருந்த பொது மக்களை கலைந்து செல்லுமாறு கூறியுள்ளதுடன் தாக்குதல் நடத்தியும் உள்ளனர்.

இந்த மோதலில் காத்தான்குடி கடற்கரை வீதி உட்பட பல இடங்களில் நிறுத்தி வைக்கப்பட்டிருந்த மோட்டார் சைக்கிள், கார், வேன் மற்றும் லொறிகள் அடித்து நொறுக்கப்பட்டுள்ளதுடன் பல கடைகளும் தாக்குதலுக்குள்ளாகியுள்ளன.

இதே போன்று சில வீடுகளிற்குள் இருந்த மின்குமிழ்கள் வீட்டின் கதவுகளும் உடைக்கப்பட்டு சேதப்படுத்தப்பட்டுள்ளன.

இதனையடுத்து இன்று அதிகாலை காத்தான்குடி பிரதான வீதியில் ரயர்கள் போடப்பட்டு எரிக்கப்பட்ட போதிலும் அவற்றை உடனடியாக அப்புறப்படுத்தி அமைதி நிலை உருவாக்கப்பட்டுள்ளதாக தெரிவிக்கப்படுகிறது.