ஜனாதிபதி ராஜபக்ஷவின் ஆட்சியைக் கவிழ்க்க சர்வதேசம் முயற்சி: கோத்தபாய

ஜனாதிபதி மஹிந்த ராஜபக்ஷவின் ஆட்சியைக் கவிழ்த்து தமக்கு தேவையான விதத்தில் ஆட்டுவிக்கும் தலைவரொருவரை ஆட்சி அதிகாரத்தில் அமரச் செய்யவே சர்வதேசம் முயற்சிக்கின்றது என்று பாதுகாப்பு அமைச்சின் செயலாளர் கோத்தபாய ராஜபக்ஷ தெரிவித்தார். இலங்கையிலுள்ள சிலர் பொய்யான தகவல்களை வழங்குவதன் காரணமாகவே எம் மீதான சர்வதேச குற்றச்சாட்டுக்கள் தொடர்கின்றன என்றும் அவர் சுட்டிக் காட்டினார்.

கொழும்பு பண்டாரநாயக்க சர்வதேச மண்டபத்தின் ""மிஹிலக'' கேட்போர் கூடத்தில் நேற்று முன்தினம் வியாழக்கிழமை இடம்பெற்ற தேசிய அமைப்புக்களின் ""யுத்தக் குற்றச்சாட்டுக்களை தோல்வியடையச் செய்வோமென்ற'' தொனிப் பொருளிலான கருத்தரங்கில் கலந்து கொண்டு உரையாற்றுகையிலேயே பாதுகாப்புச் செயலாளர் கோத்தபாய ராஜபக்ஷ இதனைத் தெரிவித்தார்.

இங்கு அவர் தொடர்ந்து உரையாற்றுகையில், சர்வதேசம் எம் மீது சுமத்திய குற்றச்சாட்டுக்களுக்கு தெளிவான பதில்களை வழங்கினோம். ஆனால் இவ்வாறு பதிலளித்திருந்தும் சர்வதேசம் தொடர்ந்தும் குற்றச்சாட்டுக்களை சுமத்தி வருகிறது. இதற்கு அவர்களின் மறைமுகமான நிகழ்ச்சி நிரலும் இங்குள்ள சிலர் வழங்கும் பொய்யான தகவல்களுமே காரணமாகும். இவ்வாறான செயற்பாடுகளை நம்மவர்கள் கைவிட வேண்டும். பயங்கரவாதிகளுக்கு எதிரான யுத்தத்தை நாமனைவரும் ஒற்றுமையுடன் முன்னெடுத்தோம் வெற்றி பெற்றோம்.

ஆனால் வெற்றி பெற்ற பின்பு இன்று பிரிந்து செயற்படுகின்றோம். இது கவலைக்குரிய விடயமாகும். ஜனாதிபதி மஹிந்த ராஜபக்ஷவின் ஆட்சியை கவிழ்த்து தமக்கு தேவையான விதத்தில் ஆட்டுவிக்கும் தலைவரொருவரை ஆட்சியதிகாரத்தில் அமரச் செய்யவே சர்வதேசம் முயற்சிக்கிறது. யுத்தம் முடிந்து குறுகிய கால எல்லக்குள் இடம்பெயர்ந்த மக்களை மீளக் குடியேற்றியுள்ளோம்.

புலி உறுப்பினர்களுக்கு புனர்வாழ்வளித்து அவர்களது குடும்பங்களோடு இணையச் செய்துள்ளோம். ஆனால் சர்வதேசம் எம் மீது குற்றச்சாட்டுக்களை சுமத்துவதை நிறுத்தவில்லை என்றார்.