'கல்முனை, கொழும்பு உட்பட 5 மாநகர சபை தேர்தலில் முஸ்லிம் காங்கிரஸ் தனித்து போட்டி'

கல்முனை, கொழும்பு மாநகர சபை உட்பட ஐந்து மாநகர சபைகளுக்கான தேர்தலில் ஸ்ரீலங்கா முஸ்லிம் காங்கிரஸ் தனித்து போட்டியிடும் என ஸ்ரீலங்கா முஸ்லிம் காங்கிரஸ் இன்று தெரிவித்தது.

கல்முனை, கொழும்பு, கண்டி, காலி மற்றும் நீர்கொழும்பு ஆகிய மாநகர சபை தேர்தல்களிலேயே ஸ்ரீலங்கா முஸ்லிம் காங்கிரஸ் தனித்து போட்டியிடும் என அக்கட்சியின் தலைவர் ரவூப் ஹக்கீம் தமிழ்மிரருக்கு தெரிவித்தார்.

ஏனைய உள்ளூராட்சி மன்றங்களுக்கான தேர்தலில் ஸ்ரீலங்கா முஸ்லிம் காங்கிரஸ் ஆளும் ஐக்கிய மக்கள் சுதந்திர கூட்டமைப்புடன் இணைந்து போட்டியிடும் என அவர் குறிப்பிட்டார்

இது தொடர்பில் ஜனாதி மஹிந்த ராஜபக்ஷவிற்கும் ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீமிற்கும் இடையில் நேற்று வெள்ளிக்கிழமை இடம்பெற்ற பேச்சுவார்த்தையின் போது இணக்கம் காணப்பட்டுள்ளதாகவும் ஹசன் அலி தெரிவித்தார்.


ஸ்ரீலங்கா முஸ்லிம் காங்கிரஸ் சார்பாக போட்டியிடவுள்ளவர்களுக்கான நேர்முக பரீட்சை நிறைவடைந்துள்ள நிலையில், கட்சியின் அதியுயர் பீடம் விரைவில் கூடி வேட்பாளர் பட்டியலை தயாரிக்கவுள்ளதாக ஹசன் அலி மேலும் குறிப்பிட்டார்.

இதேவேளை, அமைச்சர் றிசாட் பதியுதீன் தலைமையிலான அகில இலங்கை மக்கள் காங்கிரஸ் கல்முனை மற்றும் கொழும்பு மாநகர சபை தேர்தலிலும் அமைச்சர் ஏ.எல்.எம்.அதாவுல்லா தலைமையிலான தேசிய காங்கிரஸ் கல்முனை மாநகர சபை தேர்தலில் ஐக்கிய மக்கள் சுதந்திர கூட்டமைப்புடன் இணைந்து போட்டியிடவுள்ளதாக அரசாங்க தரப்பு தகவல்கள் தெரிவிக்கின்றன.

கடந்த அக்கரைப்பற்று மாநகர சபை தேர்தலில் தேசிய காங்கிரஸ் தனித்து போட்டியிட்டு வெற்றியீட்டியமை குறிப்பிடத்தக்கது.

நல்ல முயற்சி வெற்றி பெறட்டும் வாழ்த்துவோம் நாமும்