கொழும்பு மாநகர வாழ்க்கை தரத்தை உயர்த்துவதே இலக்கு

by **நேசமுடன் ஹாசிம்** Tue 20 Sep 2011 - 7:06

கொழும்பு மாநகர சபை எல்லைக்குள் வசித்துவரும் சிறுபான்மை மக்களின் தரத்தை உயர்த்துவதற்கு உடனடியாக நடவடிக்கை எடுக்கப்படுமென ஐக்கிய மக்கள் சுதந்திர முன்னணி சார்பில் கொழும்பு மாநகர சபைக்குப் போட்டியிடும் யமுனா கணேசலிங்கம் உறுதி மொழி வழங்கியுள்ளார்.

நாரஹேன்பிட்டியவில் நேற்று நடைபெற்ற ஊடகவியலாளர் சந்திப்பிலேயே அவர் இந்த உறுதிமொழியை முன்வைத்தார். கொழும்பு மாநகர சபை எல்லைக்குள் வசித்துவரும் மக்களின் வாழ்க்கைத் தரத்தை உயர்த்துவதற்கு அரசாங்கம் நடவடிக்கை எடுத்துள்ளது. இதன் ஒரு அங்கமாகவே சேரிப்புற வீடுகளுக்குப் பதிலாக புதிய தொடர்மாடி வீடுகள் அமைத்துக் கொடுக்கப்படவுள்ளன என்று அவர் தெரிவித்தார்.

அங்கு மேலும் கருத்துத் தெரிவித்த யமுனா கணேசலிங்கம், கொழும்பு மாநகர எல்லைக்குள் வசித்து வரும் சிறுபான்மை மக்களின் வாழ்க்கைத் தரத்தை உயர்த்துவதற்கும் நடவடிக்கை எடுக்கப்படும். பெண்கள் சுயதொழில்களைச் செய்யக் கூடியவாறு வாழ்வாதார பயிற்சி கள் வழங்கப்படவுள்ளன.

அதேநேரம், கொழும்பு மாநகர சபை எல்லைக்குள் வசிக்கும் சிறுபான்மை மக்களின் பாதுகாப்பை உறுதிப்படுத்துவதற்கு நடவடிக்கை எடுக்கப்படுமென கொழும்பு மாநகர சபைக்கான ஐ.ம.சு.மு. மேயர் வேட்பாளர் மிலிந்த மொறகொட எனக்கு உறுதி மொழி வழங்கியுள்ளார்.

இதனைவிட கொழும்பு மாநகர சபை எல்லைக்குள் 40 சுகாதார நிலையங்கள் மற்றும் 15 மகப் பேற்று மருத்துவ நிலை யங்கள் உண்டு. அவற்றை தரமுயர்த்தி சிறந்த சேவையை பெற்றுக் கொடுக்க நடவடிக்கை எடுப்பேன்.

சேரிப்புற வீடுகள் உடைக்கப்படுவதாக முன்னெடுக்கப்படும் பிரசாரங்கள் பொய் யானவை. மாற்று வீடுகள் அந்தந்தப் பகுதிகளிலேயே கட்டிக் கொடுக்கப்படும். மத்திய மற்றும் மாகாண அரசாங்கத்தின் உதவியுடன் அதற்கான நடவடிக்கை எடுக் கப்படும் என அவர் மேலும் தெரிவித்தார்.

இந்த ஊடகவியலாளர் மாநாட்டில் ஐ.ம. சு. மு. வின் கொழும்பு மாநகர சபையின் மேயர் வேட்பாளர் மிலிந்த மொறகொடவும் கலந்து கொண்டார்.