அன்னாஹசாரேவுக்கு ஆதரவாக தமிழகம் முழுவதும் 23-ந்தேதி கடையடைப்பு போராட்டம்

சென்னை, ஆக.21-

தமிழ்நாடு வணிகர் சங்கங்களின் பேரவை சார்பில், ஊழலுக்கு எதிராக போராடி வரும் அன்னா ஹசாரேவை ஆதரித்தும், மத்திய அரசை கண்டித்தும் சென்னையில் நேற்று ஆர்ப்பாட்டம் நடைபெற்றது.

பேரவை தலைவர் த.வெள்ளையன் தலைமை தாங்கினார். இந்த ஆர்ப்பாட்டத்தில் துணைத்தலைவர் வி.எஸ்.முத்துபாண்டியன், செயலாளர் அப்துல் குத்தூஸ், பொருளாளர் எஸ்.ஆர்.பி.ராமன், சென்னை மாவட்ட தலைவர்கள் பி.தேவராஜ், வியாசை மணி உள்பட பலர் கலந்து கொண்டனர்.

ஊழலுக்கு எதிரான கொள்கைகளை வலியுறுத்தும் பேனர்கள் மற்றும் தேசியக்கொடிகளை தங்கள் கைகளில் ஏந்தி இருந்தனர்.

அன்னா ஹசாரே வலியுறுத்தும் வலுவான ஜன லோக்பால் சட்டத்தை அமல்படுத்த வேண்டும், ஊழலுக்கு எதிராக களமிறங்கி இரண்டாம் உலகப்போருக்கு அழைப்பு விடுக்கும் அன்னா ஹசாரேவை இந்திய குடியரசு தலைவராக்க வேண்டும், அன்னிய ஆதிக்கத்தை அனுமதிக்கக்கூடாது உள்ளிட்ட பல்வேறு கோரிக்கைகளை வலியுறுத்தி அவர்கள் கோஷங்கள் எழுப்பினர். ஆர்ப்பாட்டத்தில் தமிழக வணிகர் சங்கங்களின் பேரவை தலைவர் த.வெள்ளையன் பேசியதாவது:-

அன்னாஹசாரே ஊழலுக்கு எதிராக போராட ஆரம்பித்து 10 நாட்கள் ஆகிவிட்ட போதிலும், மத்திய அரசு இன்னும் மவுனம் சாதித்துக் கொண்டிருக்கிறது. ஊழலுக்கு எதிராக போராடி வரும் தியாகியும், தேசபக்தருமான அன்னா ஹசாரேவை புறக்கணித்து விட்டது.

காந்திய கொள்கைக்கு ஆதரவாக விடாபிடியாக செயல்படும் அன்னா ஹசாரேவுக்கு ஆதரவாக துணையாக செயல்பட நாமும் களம் இறங்க வேண்டும். மவுனம் சாதித்துக் கொண்டிருக்கக்கூடாது.

வருகிற 23-ந்தேதி அனைத்து அரசியல் கட்சிகளும் தமிழகம் முழுவதும் அன்னா ஹசாரேவுக்கு ஆதரவாக போராட்டங்கள் நடத்த உள்ளன. அதைபோல் நாமும் அன்று கடையடைப்பு போராட்டம் நடத்த வேண்டும்.

இவ்வாறு அவர் பேசினார்.
மாலை மலர்

வேலை இல்லா வெட்டிப் பஷங்க இது தேவையா