லிபியா தலைநகர் திரிபோலியை கைப்பற்ற கிளர்ச்சியாளர்கள் சண்டை

திரிபோலி, ஆக. 21-

லிபியாவில் அதிபர் கடாபிக்கு எதிராக கடந்த 5 மாதங்களாக போராட்டம் நடைபெறுகிறது. போராட்டத்தை ஒடுக்க ராணுவம் பயன்படுத்தப்படுகிறது. இருந்தும் பொதுமக்களின் போராட்டம் ஓயவில்லை. அவர்கள் கிளர்ச்சியாளர்கள் படையை அமைத்துள்ளனர். இவர்களுக்கு அமெரிக்கா, இங்கிலாந்து உள்ளிட்ட “நேட்டோ”நாடுகளின் படைகள் ஆதரவாக உள்ளன.

எனவே, கிளர்ச்சியாளர்களின் படை பெங்காசி, பிரெகா மற்றும் நகரங்களை கைப்பற்றி தங்கள் கட்டுப்பாட்டில் வைத்துள்ளனர். தஜுரா மாவட்டம், வடக்கு மற்றும் மேற்கு திரிபோலி பகுதிகளில் ஓயாமல் சண்டை நடைபெறுகிறது.

இதற்கிடையே “நேட்டோ” படைகளின் போர் விமானங்கள் இன்று அதிகாலை 4 மணிக்கு காடாபியின் ஆதரவாளர்கள் மற்றும் அவரது படை நிலைகள் மீது சரமாரியாக குண்டுகள் வீசின. தற்போது தலைநகர் திரிபோலியை கைப்பற்றும் முயற்சியில் தீவிரமாக உள்ளனர். இதனால் இவர்களுக்கும், கடாபியின் ஆதரவு ராணுவத்துக்கும் இடையே கடும் துப்பாக்கி சண்டை நடக்கிறது.

தற்போது கிளர்ச்சியாளர்களின் கை ஓங்கியுள்ளது. எனவே விரைவில் திரிபோலி நகரை கைப்பற்றி போராட்டத்தை முடிவுக்கு கொண்டு வருவார்கள் என எதிர்பார்க்கப்படுகிறது.

இந்த நிலையில், அதிபர் கடாபி தனது ஆதரவாளர்களுக்கு ஆடியோ மூலம் நிகழ்த்திய உரை டெலிவிஷனில் இன்று ஒளிபரப்பப்பட்டது. அதில், பொய் வேடதாரிகளுக்கு முற்றுப்புள்ளி வைக்க லட்சக்கணக்கான மக்கள் ஒன்றுபட்டு அணி திரள வேண்டும்.

பெருச்சாலிகள் மற்றும் துரோகிகளிடம் இருந்து லிபியா நகரங்களை மீட்க வேண்டும். தற்போது அவை அழிக்கப்பட்டு வருகின்றன. கடவுள் மிகப் பெரியவர் அவர்கள் மிகவும் கீழ்தரமானவர்கள் மசூதிகளின் புனிதத்தை கெடுத்து தீட்டு உண்டாக்குகின்றனர் என்று பேசியுள்ளார்.

மேலும் பிரான்ஸ் அதிபர் நிகோலஸ் சர்கோசியை கடுமையாக சாடியுள்ளார். ஏனெனில் நேட்டோ படைகளின் வான்வெளி தாக்குதலுக்கு அவரது பிரான்ஸ் படைகள் பெருமளவில் உதவி வருகிறது. கிளர்ச்சியாளர்களை தங்கள் ஏஜெண்டுகளாக்கி லிபியாவின் எண்ணை வளத்தை கொள்ளையடிக்க அவர் திட்டமிட்டுள்ளார். அவரது எண்ணம் பலிக்காது என்றும் கூறியுள்ளார்.

முதலில் இவர் நாட்டை விட்டு ஓடிவிடுவது நல்லது ....