சட்டவிரோதமாக எடுத்துவரப்பட்ட சிகரட்டுக்கள் பொலிஸாரால் மீட்பு

சட்டவிரோதமாக எடுத்துவரப்பட்ட சிகரட்டுக்கள் பொலிஸாரால் மீட்பு
இருவர் கைது; ஆட்டோவும் தடுத்து வைப்பு
(ஸாதிக் ஷிஹான்)
வெளிநாட்டிலிருந்து இலங்கைக்கு சட்ட விரோதமாக கொண்டு வரப்பட்ட ஆறாயிரம் சிகரட்டுகளை பொலிஸ் விஷேட அதிரடிப்படையினர் கிராண்ட்பாஸ் பகுதியில் கைப்பற்றியுள்ளனர்.

சட்டவிரோத சிகரட்டுகளுடன் அதனை எடுத்துச்செல்ல பயன்படுத்தப்பட்ட முச்சக்கர வண்டியையும் கைப்பற்றியுள்ள விஷேட அதிரடிப் படையினர், அதில் பயணம் செய்த இரு சந்தேக நபர்களையும் மடக்கிப் பிடித்துள்ளனர்.

கைப்பற்றப்பட்ட சிகரட்டுகளில் ‘பென்சன்’ என்ற பெயர் பொறிக்கப்பட் டிருந்ததாக விஷேட அதிரடிப் படை அதிகாரி ஒருவர் தெரிவித்தார்.

விஷேட அதிரடிப்படை அதிகாரி ஒருவருக்கு கிடைக்கப்பெற்ற இரகசிய தகவல் ஒன்றையடுத்து கிராண்ட்பாஸ் பகுதிக்கு விரைந்த அதிரடிப் படையினர் சட்டவிரோத சிகரட்டுகளுடன் சென்றுக் கொண்டிருந்த முச்சக்கர வண்டியை சமகிபுர தொடர்மாடிக்கு அருகில் வைத்து நேற்று முன்தினம் (20) இரவு 8.00 மணியளவில் பிடித்துள்ளனர்.

கொழும்பு - 12 மற்றும் வெல்லம்பிட்டிய பகுதிகளைச் சேர்ந்த இரு சந்தேக நபர்களையே அதிரடிப் படையினர் கைது செய்துள்ளனர்.

கைப்பற்றப்பட்ட சட்டவிரோத சிகரட்டுகள் மற்றும் முச்சக்கர வண்டியையும் கைது செய்யப்பட்ட இரு சந்தேக நபர்களையும் மேலதிக விசாரணைகளுக்காக கிராண்ட்பாஸ் பொலிஸாரிடம் ஒப்படைத்துள்ளனர்.

கைப்பற்றப்பட்ட சிகரட்டுகள் எங்கு தயாரிக்கப்பட்டவை எவ்வாறு கொண்டு வரப்பட்டன என்பன தொடர்பான விசாரணைகளை கிராண்ட்பாஸ் பொலிஸார் ஆரம்பித்துள்ளனர்.

தகவலுக்கு நன்றி நண்பன்.